Shillong, Naitung 30 : Ka National People’s Party (NPP) kaba ïalam mynta ïa ka sorkar jylla ka la pynkhreh ban sei da u MLA barim ban aireng ha kane ka elekshon MP kaban sa long shen ha u snem ban wan.
Ki tyllong khubor ba tikna watla kim pat kwah ban pynpaw ïa ka kyrteng hynrei ki la ïathuh pat ba utei u MLA barim u dei ruh uba la bat teng ïa ka kam kum u ophisar heh ha ka sorkar shwa ba un shongthait bad aireng ha ka elekshon ha u 2018.
Haba pyrshang ban wad jingtip la utei u kyrtong ba ka party ka pynkhreh ban sei u dei na ka party NPP lane na kiwei pat ka party, hynrei ka jubab kaba la ïoh ka long, “Sa tang khyndiat por eh yn sa pynbna paidbah noh,” ong ki tyllong khubor.
Tangba, la sngewthuh pat ba utei u MLA um dei satia na ka NPP tangba u dei pat na ka party kaba don khyndiat ngut ki MLA kaba trei lang ha ka sorkar synrop MDA.
Kumba long haduh mynta, la ïathuh ruh ba kiba bun ki nongïalam jong ka party ki la ïa hun, hynrei ki hap pat ban bud ïa ki kyndon jong ka party ha shwa ban shim ïa ka rai kaba khatduh, kaba mut ba lada jia ba baroh ki biang nadong shadong, utei u MLA barim da kaba suk un ïoh ban ïa khun na ka tiket NPP ha kane ka elekshon MP.
Lah ruh ban kdew hangne ba na ki party kiba bun kiba don ha ka jylla, dei tang ka Voice of the People’s Party (VPP) kaba la dep ban pynbna ïa u kyrtong, kata u General Secretary ka party, Dr. Ricky AJ Syngkon. Katba kiwei pat ki party la ka long naduh ka UDP, BJP, HSPDP, AITC bad kiwei kiwei kim pat khih satia ban pynbna ïa u kyrtong ban aireng ha kane ka elekshon MP sha Lok Sabha.
