Shillong, Nailur 25 : Ka jingïalang jong ka Voice of the People’s Party (VPP) kaba long ha ka janmiet sngi Palei da kawei ka rai ki la mynjur ban phah ïa ka kyrteng jong u MDC na Nongthymmai constituency Bah Winston Tony Lyngdoh ban shimti ïa ka shuki CEM ha KHADC hadien ba u Bah Shemborlang Rynjah u la resain noh na ka shuki CEM ha kane ka sngi Balang na ka daw ka jingshitom.
Katkum ka kyrwoh ba la pyllait da u Nongai Ktien ka Party Bah Powell Sohkhlet, la ïathuh ba ha kane ka jingïalang la jied ruh ïa u Bah Denzil R Chen, MDC ka Jaïaw ban shimti noh kum u Executive Member ba thymmai. Lah ruh ban kdew hangne ba u Bah Winston Tony u la bat kum u Executive Member ha ka Executive Committee ba la dep hapoh ka jingïalam jong u Bah Shemborlang Rynjah.
Kumta da ka jingshimti noh jong u ïa ka shuki CEM, kawei ka shuki Executive Member ka la lait thylli bad kumta na ka liang ka party kala shim ïa ka rai ban thung bujli noh da u Bah Denzil ha jaka jong u.
Kumban shu pynkynmaw, na ki 30 ngut ki dkhot jong ka Iing Dorbar Thawain jong ka KHADC, haduh 18 ngut ki dei na ka VPP kynthup lang ïa uwei u MDC shu sieh Bah Mathew Makdoh.
Katba ka NPP bad UDP pat mynta ki don mar san ngut, uwei u MDC shimet bad uwei pat na ka HSPDP.
