Jowai, Ïaïong 13: Ka Khasi Student Union (KSU) hynin ka sngi da ka jingbitar kala leit rah syndon da u mawria ba pyntrei ïa ka surok NJB bad leit pyni syndon ha u EE halor ka rukom pyntrei ïa kane kasurok kaba hap hapoh ka shnong.
La ïathuh ba katei ka jingleh bym siudñiew u Contractor ïa utei u surok wat hadien baka seng bad ki nongïalam shnong ki lah wan ujor sha office PWD, la paw biang ba u Contractor ba pyntrei surok u dang leh thurmur wat hadien ba la dep ban pynsangeh ïa ka jingpyntrei surok ha kine ki bnai ba la dep.
Ka seng hadien ba la ïoh jingtip ïa kane ka jingpyntrei tangdep da kaba shu leh thok, kala leit hiar mar mar ban ïohi hi dala ki jong ki khmat, ha kaba ka seng ka la sakhi ba ka jingpyntrei biang ïa ka surok kala long haka rukom ba dei hynrei u Contractor u khlem sngap satia u pyntrei pynban daka mon jong u hi kata da kaba siang da u mawria haka jaka u mawshape.
La ong ruh ba ki dkhot shnong ki la dep ban wan mih sha ka office PWD halor katei ka jingleh u Contractor, hynrei kiba pyntrei surok kila sdang ban tep eit miaw ïa u mawria da u mawshape tang ban pyni ka sakhi ba ki leh kumba lah phah order hi.
Ka seng lem bad ki nongïalam shnong ki la kren shai ba kane ka dei ka sien ba khatduh ba kin wan jngoh ïa kane ka surok lada ki Contractor kim kheiñ snep na ka liang ka seng bad ki nongïalam shnong kin shim da kawei ka rai kaba tyngeh pyrshah ïa kiba donkti ban pyntrei ïa kane ka surok, pynkut ka kyrwoh na u Publicity ka seng samla Lamdaki Myrchiang.
