Da u Masi la pyndep ïa ka Kñia Sapet Bneiñ ha Khloo Blai ka Seiñ Raij Ialong

Jowai, Nailur 22: Ka Seiñ Raij Ialong mynta ka sngi 22 tarik u Nailur kala pyndep ïa ka lehñiam Kñia Sapet Bneiñ (Sohpet Bneng) kaba ïaid beit ïaid ryntih bad ïa kane ka lehñiam jong ki khun ka Raij la ju leh ïa ka naduh ki por jong ki Longshwa Manshwa.
Ïa kane ka jingkñia Sapet Bneiñ la pyndep hapoh ka Lawkyntang (Khloo Blai) jong ka shnong Ialong kaba la sdang naduh ka por 9 baje mynstep da ka nguh ka dem hashwa ban kñia ïa u Masi bad pynkut ha ka por janmiet da kaba ïabam pynkhuid ïa ka doh ba la pynkhreh ha ka sla kait, da ki khun ka Raij kiba kynthup ïa ka Wahiajer, Nongkhyllep bad Ïalong.
‘Baroh kila leit sha ka jaka ba lehñiam kila hap ban ïaid da ka kjat suda bad khlem da don ki kynja snieh kum u Bell bad ki pla pisa ban sakhi ïa katei ka lehñiam Kñia Sapet Bneiñ”.
Na ka liang u President jong ka Seiñ Raij Ialong u ma Pyrkhat Shylla ula ong ba ïa kane ka lehñiam Kñia Sapet Bneiñ la leh ïaka ha ki por ba rim ba ka jingpang khlam kaba jur bha bad kane ka khlam kala ktah ïa ki briew jong ka shnong ka thaw, wat na ka liang u Langdoh bad ki Khyndai wasan kila pyrshang ban leit mane ïa ki Blei ki Syiem kiba don hapoh ka Ri-Lum Jaiñtia ban ïada ïa ka khlam hynrei kim shem la ïoh satia ïa ka jingkoit jingkhiah.
La ïathuh ha kaba khadduh kila leit noh sha Khasi sha u ‘Blei Sohpet Bneng’ lyngba u Syiem Mylliem bad buh ka jingkyrpad kyrpon na u Lei Sohpen Bneng ba un ai ka jingkoit jingkhiah ïa ki khun ka Raij na ka jingwan lyngshop ka klam ha kata ka por.
Hadien kane u Lei Sohpet Bneng ula pan na ki khun ka Raij ïa ka nguh ka dem da kaba kñia noh da u Masi bad u Masi yn long uba heh ka met, uba ba khlaiñ ha ka rep ka riang bad uba khlem thoh bria bad uba khlem don ki dak mong ha met.
Ïa ka doh kaba la dep ban pyndep ïa ka ñiam ka rukom mynta hi ka sngi la bam pynkhuid lut ïa ka da ki khun ka Raij bad ka jingbam ïa ka doh masi ka long ‘shi bynta na jingïakut bad u Lei Sohpetbneng uba la kwah ban bam da u Masi ba un da u ker ïa ki jingsniew kiba ha rukom’.
Shuh shuh u ma Shylla ula ong ba ka jingpyndep ïa kane ka lehñiam mynta u snem ka long kaba khuid ba suba bad kaba ïaidbeit ïaid ryntih da ka jingkmen ïa ki khun ka Raij hapoh ka jingïalam u Langdoh bad ki Khyndai Wasan. Ula ïathuh ruh ba ka jingkñia da u Masi ka long katkum ki ñia ki jutang kiba long hapoh ka 15 snem dei ban kñia beit da u Masi.