Shillong, Nohprah 04: Ka National People’s Party (NPP) ka la thung ïa u Lamphang barim ka Ïingdorbar Thaw Aiñ ka jylla Manipur u Irengbam Hemochandra Singh kum u National Vice President ka Party na ka bynta ka samoi treikam 2025-2028.
Ha ka kyrwoh ba la phah, u National President bad Myntri Rangbah ka Jylla Meghalaya Conrad K Sangma ha ka jingpynbna ba la pynmih ha ka sngi Palei u la ïathuh ïa kane.
Lah ban ong ba u Singh u la rung sha ka jylli saiñ hima sima hadien jong u Kpa (L) Tompok Singh uba la khlad noh khlem dei por namar ka jinghap ka liengsuiñ ha u snem 1991. Ula shah jied kum u MLA na ka constituency u Kpa ha ka rta ba 26 snem bad ula jop haduh 5 tylli ki elekshon Assembly ka Jylla.
Haba jubab sha u Conrad, u Singh ula pynpaw ïa ka jingsngewnguh ïa ka jingai jingshaniah ha u bad ong, “Nga pynpaw ïa ka jingsngewnguh naduh ka mynsiem ïa ka jingshaniah bad ka jingburom ba phi lah ai ha nga da ka jingkitkhlieh ban shakri kum u National Vice President ka NPP”.
Na ka liang u Singh ula pynthikna ïa ka jingkut jingmut ban shakri katkum ki jingthmu bad ki thong jong ka party haba ong, “Nga pdiang ïa ka jingkitkhlieh bad pynskhem ïa ka jingaiti jong nga ban trei hok bad aiti pura sha ki thong, ki mishon bad ki mat treikam jong ka party”.
Shuh shuh u la ai burom ïa u nongseng ba la khlad noh ka NPP, u (L) PA Sangma bad ong, “Nga ai ka jingburom bad ka jingsngewnguh kaba khraw ïa u (L) PA Sangma, uba ka jingmut jingpyrkhat, ka jinglong nongïalam, bad ka jingaiti lut jong u sha ki paidbah ka thaiñ Shatei Lammihngi ka dang ïai bteng ban ai mynsiem ïa ngi baroh haduh mynta mynne.”
