Boko, Iaiong 6: U National President ka National People’s Party (NPP) uba dei ruh u Myntri Rangbah ka jylla Meghalaya u Conrad K Sangma mynta ka Lah Sngi U Blei ula hiar ïalap elekshon ha Bamunigaon kaba hap hapoh ka 28–Boko Chaygaon (ST) constituency ka Jylla Assam ban pan jingkyrshan ïa u kyrtong ka NPP u Ganseng B. Sangma. Namar ka NPP ka sei da u kyrtong na ka jaidbynriew Garo ha katei ka Constituency kaba ki paid Garo ruh ki bun bha.
Ha kane ka jingïalap election la sakhi ïa ka jingwan shim bynta da ki hajar ngut ki nongkyrshan kiba la ïalum ban pynpaw ïa ka jingïatylli bad ka jingthmu jong ka NPP na ka bynta ka thaiñ shatei lam mihngi.
Ha kane ka sngi la wan ban ïashim bynta da ki katto katne ngut ki nongïalam ka NPP, kynthup ïa ki MLA na Meghalaya bad ki MDC na Garo Hills Autonomous District Council (GHADC), ryngkat u National Vice President u I Hemochandra Singh bad u nongïalam ka Manipur Legislative Party u M Rameshwar Singh.
Haba kren sha ki paidbah, u Conrad u la batai ïa ka election kum ka por kaba pynthikna ïa ka jingïatylli ha ka thaiñ. “Kane ka elekshon ka dei ka sur jong ka thaiñ shatei lam mihngi, ka sur ka ban sawa na Boko-Chaygaon”, u la ong da kaba pynksan ba ka result ka ban mih kan pyni la ki paidbah ka thaiñ ki la ïatylli ne em hapoh kawei ka jingthmu.
Haba pynpaw ïa ka jingpynheh ïa ka party, u Conrad la pynpaw ba ka NPP ka la pynkhreh ban plie ïa ka account jong ka ha Assam bad ban pyndep ïa ka jingthmu jong u nongseng ïa ka NPP u PA Sangma ban tei ïa ka thaiñ shatei lammihngi kaba khlaiñ bad kaba ïatylli.
U la kynthoh ïa kiwei National Party kiba leh politics ban pynpait pynpra ïa ki jaidbynriew bad u la khot ïa ki nongthep vote ban kyrshan ïa ka Party da kaba buh hakhmat eh ïa ka jingïatylli bad ka jingroi kaba kynthup lang.
Haba pynkynmaw ïa ka jinglong jong u kpa jong u, u Conrad u la ïathuh kumno u PA Sangma un leit sha ki jaka kiba jngai ban kren wat ha ki jingïalang kiba rit tam da ka jingsngewrit bad jingburom. U la kdew ba kum kane ka jingaiti ha ki nongrim ka long ka nongrim jong ka jingdon jong ka NPP kaba nangroi ha kylleng ka thaiñ.
“U symbai ba la thung da u PA Sangma ha Meghalaya shiphew snem mynshwa mynta u la heh bad long u dieng uba ai jaka rieh ïa ka thaiñ Shatei Lammihngi baroh kawei,” u la ong. “Ka jingangnud jong u ban pynïatylli ïa baroh ki jaitbynriew hapoh kawei ka rynsan ka la nang long kaba shisha.”
U Conrad u la kyntu ïa ki nongthep vote ban kyrshan ïa u Ganseng B Sangma, da kaba batai ïa u kum u nongïalam uba shisha bad uba aiti lut uba pynpaw ïa ka jingangnud jong ka NPP na ka bynta ka roi ka par kaba kynthup ïa baroh.
“Lada u Ganseng un long MLA, kan pyni ïa ka jingthmu kaba thymmai ia ka NPP ha Assam”, u la bynrap.
Ha ka jingkren lyngkot jong u Ganseng B Sangma u la kular ban shakri da kaba aiti lut ïa ki paidbah da kaba ong, “Nga kren tang shi minit hynrei ngan trei pat arphew shah”.
