Shillong, Naitung 22: U Company Commander, E-Coy, 22nd Bn., BSF, BOP Jatrakona (SGH) u la ujor ba ha ka 18 tarik mynta u bnai, ki shipai BSF ki la ïohi ïa ka jingïaid ki suba nongkhaïi tuh ha shi lynter u pud u sam ka ri bad hadien ba kitei ki nongkhaïi tuh ki la ïohi ïa ki shipai ki la kawang da ki maw, halor kane ka jingjia uwei u shipai BSF u la kawang u wei stun grenade. Hadien kane, kitei ki suba nongkhaïi tuh ki la phet krad noh na katei ka jaka bad na ka liang ki BSF ki la lap 6 tylli ki pla na PO, ha kaba 3 tylli kiba la thoh da ka address ka M/s S Medicals Dalu, ki la don da ki ‘saree’ bad ki dawai ha kaba ïa kine ki tiar la aiti noh sha ki pulit ka Gasuapara PS (SGH).
Ha kawei ka jingjia, u Company Commander, D-Coy, 50th Bn., BSF (SWGH) u la phah ka jingujor ba ha ka 18 tarik mynta u bnai ha ka por 10.30 baje mynmiet, ki shipai BSF ki la ïohi ïa ka jingïaid lynti jong ki runar bym lah ban ithuh ha shi lynter u pud u sam ka ri ha kaba ki shipai ki la siat shisien; bad halor kane, kitei ki runar ki la phet noh na katei ka jaka. Kham hadien pat ki shipai BSF ki la lap ba ka bynta jong ka jingker sainar shiah ha shi lynter u pud u sam ka India bad Bangladesh kaba don hapdeng ka BFL No. 34 to 35, hajan BP No. 1091/3-S Gate No. 45, la shah pynjulor.
