Da u durmot tei ka YMA ha Ri-Bhoi College ban pynsahnam ïa u Dr. D.D Lapang

Nongpoh, Rymphang 13: Ka long ka jingsah jingkynmaw haka history ba ka Young Minds Association kawei naki kynhun jong ki samla kiba dang khie dang san bad dang khlaiñ ka pyrkhat pyrdaiñ kan pyndonburom da u motdur ba shirynïeng ïa u briew u ba dang im bad dang khih ha kane ka sla pyrthei.
U motdur ba shirynïeng ba la pynïeng da ka Young Minds Association ka dei jong u Dr DD Lapang Myntri Rangbah barim ka jylla ba dei ruh uwei naki nongïalam bad riew pawkhmat haka jylla baka Ri-Bhoi ka ju ai burom kum u Kpa ka Ri-Bhoi, ba dei ruh u nongaibuit ba rangbah ka sorkar jylla, hadien shibun ki kam bad ki matti ba u la pynsahnam bad noh synñiang haka district bad dei halor katei ka nongrim ba kum ka kynhun Young Minds Association kala shim ïaka sienjam ban pyndon burom bad pynsah jingkynmaw da u motdur ha phyllaw jong ka Ri-Bhoi College bala wan ban plie paidbah da u Bah Prestone Tynsong Symbud Myntri Rangbah ka jylla kum u kongsan.
Ha kane ka sngi u Dr. DD Lapang da ka met lajong wat haka jinglong tymmen u la wan ban shim bynta lang ban sakhi ïa katei ka sngi sah kynmaw ryngkat ka jingsynran lang bad ka jingpynshngaiñ jong ki bahaiing hasem.
La sakhi ruh ha katei ka sngi da ka jingdonlang ka kong Ampareen Lyngdoh Myntri ka tnad ka koit ka khiah ka jylla, Bah Mayral Born Syiem MLA ka Nongpoh, Bah Charles Marngar MLA ka Mawhati, u Bah Isynei Hinge President jong ka Young Minds Association, Bah Bipul Thangkhiew President ka RBYF bad kiwei kiwei ki riew rangbah naduh ki nongïalam shnong, nongïalam saiñ Hima bad ki riew pawkhmat naka them Ri-Bhoi.
Haba kren ha katei ka sngi naka liang u Bah Isynei Hinge President ka Young Minds Association u la ong ba kum ka kynhun hi baroh kawei ka dap da ka jingsngew nguh ïa u Maheh Dr DD Lapang bad ka iing ka sem baroh kawei ba kila ai jingbit ïaka seng ban shna ïa u motdur naka bynta ban pynsah jingkynmaw ïaki matti ba u Maheh Dr DD Lapang u noh synñiang sha u sup u thiar ka District bad ka jylla baroh kawei.
U la ong ruh ba kam dei kaba suk ban pyntyllun ïaka kam wat hadien bala ioh jingbit na u Dr DD Lapang bad ka iing ka sem ban shna ïa u motdur bad kum ka kynhun hi ka kynduh shibun ki jingeh, hynrei kum ka kynhun ka ai ka jingsngewnguh pat sha u Blei ba kala lah ban kynduh shibun ki briew kiba la kyrshan met bad mynsiem ïa katei ka jingthmu jong ka seng.
U la ong ba ka jingpynieng ka kynhun Young Minds ïa utei u mot kam dei tang ka tamasa hynrei ka long ban ai mynsiem ïaki khun samla ki riew rangbah haka district bad ka jylla baroh kawei ba ka jingduk jingkyrduh kam lah ban khanglad ïa u briew ban poi shaka thong kumba ka dei ka jingim jong u Dr DD Lapang u ba la mad shibun ki jingeh tad haduh ba un da long u nongïalam haka district bad ka jylla hi baroh kawei.
Na ka liang u Bah Prestone Tynsong kum u kongsan haba kren ha katei ka sngi u la ai ka jingïaroh ïaka Young Minds Association kaba la shim ïa katei ka sienjam ban kynmaw ban shna da u motdur ban pynsah jingkynmaw ïaki kam bad ki jingnoh synñiang jong u Dr DD Lapang haka them Ri-Bhoi bad ka jylla baroh kawei, ha kaba ki briew haduh mynta ki dang pyrto ïaki kam jong u wat haka rta ka jinglong tymmen.
U la ïathuh ruh ba u la pynïasoh ïalade sha ka politik ha u snem 2000 bad ki coach ba pawnam hakato ka por ki dei u Ma PR Kyndiah (bam kwai ha dwar u Blei) bad u Dr DD Lapang bad u Maheh Lapang u la ai jinghikai ym dei tang ïa u hynrei shibun ngut ki briew kiba la long nongïalam khamtam u Bah Mayral Born Syiem MLA ka Nongpoh bad u Bah Charles Marngar MLA/ MDC ka Mawhati.
U la ong ruh ba ki kam ba radbah jong u Dr DD Lapang ai ba kin dang tuid haki por ba ki snem bad ka pateng ban wan, bad ngin buh ruh haki jingduwai ba u Maheh Dr DD Lapang un dang im shongprah shongshang.
Naka liang u Dr DD lapang u la pynpaw ka jingsngewnguh shikatdei ïaka kynhun Young Minds kaba la kynmaw burom ïa u ban buh da u mot dur ban sah jingkynmaw bad ma u ryngkat bad ka ïing ka sem kin ïai pyrto junom ïaka kynhun Young Minds.