Da u Bah Carness Sohshang mynjur ka NPP ban pynïeng na Mawkyrwat Constituency

Mawkyrwat, ‘Nailur, 22: Ka National People Party, Mawkyrwat Block ryngkat ka jingdonlang jong ki nongkyrshan bad ki nongïalam jong ki Primary Unit na ki tnad bapher bapher jong ka Mawkyrwat Contsituency hynnin ka sngi Saitjaiñ ki la ai jingmynjur ïa ka kyrteng jong u Bah Carness Sohshang ban pynïakhun ïa ka elekshon MDC na Mawkyrwat Constituency.
Kane ka jingïalang, ka la long kaba ïaid beit ha kaba kam shym la don satia kano kano ka jingkhohnïoh na kano kano ka liang bad baroh ki la mynjur bad hun lang ïa ka kyrteng u Bah Carness Sohshang kum u kyrtong uba dei ruh u MDC ba mynta jong ka Mawkyrwat Constituency.
U President jong ka NPP Mawkyrwat Block u Bah P. Nongsiej ha ka jingïakren bad ki lad pathai khubor u la ïathuh ba ka Mawkyrwat Block ka la pyndep ïa la ka kamram bad shen kan sa phah ïa ka kaiphod sha ka NPP South West Khasi Hills District bad sha ka NPP Meghalaya State Unit ban ai jingmynjur ïa ka kyrteng u Bah Carness.
“Ngi ngeit skhem ba ki nongïalam ba halor jong ka NPP kin pdiang bad burom ïa kane ka rai jong ki paidbah ka Mawkyrwat Constituency,” u la ong.
Ha kane ka sngi la ïadonlang u Working President jong ka NPP South West Khasi Hills District u Bah H.Stalyne Deingdoh, u Secretary jong ka NPP Block Unit u Bah Sylvester Syiemlieh, u MDC barim u Bah Enbin Kharaswai bad kiwei kiwei de ki nongïalam.