Shillong, Nohprah 22 : U Bah PT Sawkmie, MLA barim u la pynpaw ba u dih da sha saw bad bam da ja thah haba rakhe Khristmas ha ka por ba u dang khynnah, na kadaw ba u wan na ka longïing kaba duk.
U pynpaw ba kim ju phohsniew cake Khristmas ha kito ki por kum ka longïing bad wat ka riam ruh ki thied da ki jaiñ second hand ban phong Khristmas.
Kum uba wan na ka longïing kaba duk u sngewthuh bha ïa kiba duk bad u sngew ba khlem da ai eiei ne ïarap ei ei ïa kiba duna ka jingïoh, u sngew ba kam long ka jingrakhe Khristmas kaba pura.
U bah Process u la pynpaw ïa kine ki kyntien ha ka sngi rakhe advance Khristmas bad ki paidbah nongshong shnong ka Madan Mawkhar ha ka 21 tarik u Nohprah, 2024 ka sngi Saitjaiñ.
Kum shi bynta jong ka jingrakhe u la ai jingai sngewbha Khristmas sha ki paidbah nongshong shnong ka Madan Mawkhar ban ïaleh kmen lang bad ki ha kane ka sngi.
Ha kane ka sngi la ïoh ruh ïa ka jingkren na u bah P. Khymdeit, bah T. Nongshillong, kiba dei ki rangbah shnong barim bad ïa ka jingïalang la pynïaid da u rangbah shnong bah D. Jones Kharsati.
