Da leilei ngin ym ailad ban tih Uranium na Domïasiat watla ngin hap ban mad ïa ka jingïap : KSU

Mawkyrwat, Risaw, 28: Ka Khasi Students’ Union (KSU), South West Khasi Hills District ha ka sngi Baar ka la hiar sha ka shnong Domiasiat, South West Khasi Hills District ban rakhe kynmaw burom ïa ka lyngkhuh sngi ïap kaba san jong i Mei ieit Spility Lyngdoh Langrin iba la khlad noh ha ka 28 tarik, Risaw, 2020.
Ia ka sngi iap jong i mei ieit Spelity ka KSU ka la pynbna kum ka “Anti-Uranium Day” ban pyrshah ïa ka jingthmu ban tih Uranium na kane ka thaiñ.
Ha ka jingïalang ba lyngkot, u Vice President ka KSU Central Body u samla Biangbor Paliar u la pynpaw ka jingsngewkmen halor ka jingïaid shaphrang jong ka ïing ka sem jong i Mei ieit Spility ba ka dang ïai skhem bad nang khlaiñ ban pyrshah beit ïa ka jingtih ïa u Uranium na Domïasiat.
U la ong ruh ba watla ka Sorkar India ha kine ki khyndiat bnai ka la pynmih ïa ka Office Memorandum da kaba ong ba kam donkam shuh ïa ka jingpynsngew paidbah hashwa ban tih Uranium, hynrei halor kane ka jingthmu kum ka seng kaba la ïeng rasong naduh mynshwa da kawei ka sur, kumta, kan ïeng rangbah ban ym ailad lalei lei ruh em, jia katba jia bad long katba long, ïa ka jingtih ïa u Uranium.
Ha shwa ban hiar sha ka shnong Domïasiat ban leit buh syntiew, ka KSU ka la teh ïa ki banner ha Mawkyrwat, Umdohlun bad Wahkaji ban kynmaw burom ïa i mei ieit Spility bad ban phah ruh ïa ka khubor kaba shai sha ka Uranium Corporation of India Limited (UCIL) bad sha ka Sorkar India ba ka KSU kan ym ailad ban tih Uranium wat lada kin hap ban mad ïa ka jingïap.
Kiwei pat kiba la ai jingkren kynthup ïa u President KSU South West Khasi Hills District Bah Forwardman Nongrem, Information & Publicity Secretary KSU CEC u Bah Pynshai Rani, u President ka KSU East Jaiñtia Hills District u Bah Streamly Suchen, u General Secretary ka KSU West Khasi Hills District u Bah Franklin Syiemiong bad u Bah Phrijun Lyngdoh Langrin uba dei u khun jong i mei ieit Spility.