Shillong, Iaiong 18 : Da lei lei ruh kam lah shuh ban long ban phai dien biang ne ban bishar bniah biang ïa ka soskular ne Memorandum of Understanding (MoU) ba la ïasoi da u Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma hakhmat u Myntri Kam Pohïing ka ri u Amit Shah.
“ Ngan kren beit da kaba shai kdar ba kane kaba ngi leh mynta nga ong ïa phi ba ngi la dep shong bishar la bun bun sien da kaba pynshong nongrim na ki kot ki sla ba la ai da ka sorkar ba mynshwa hapoh ka jingïalam u Dr Mukul Sangma kumta ngi leh ruh da kaba pynshong nongrim bha bad ban phai dien ne bishar bniah biang kam lah shuh ban long, namar ngi leh ruh na ka bynta ka pateng ban dang wan. Lada ngim leh mynta ngin dang buh shuh shuh ïa ka pateng ban wan ha ka jingeh kaba khraw namar lada ka Assam ka la nang klun nangklun ïa u pud, shano shano ruh ym poi na kata ka daw nga kren shai ba kito ki jaka bym ju ïoh mynta ngi ïoh bad kito kiba ïaid sha Assam bad kiba ym don ne pynpaw ei ei ha ka kaiphod ba la phah ha u 2011 da ka sorkar Meghalaya sha Assam ïa kito ki jaka khlem ïa ktait namar kato ka dei ka final list ba la phah ha ka por jong u Dr Mukul Sangma. U phah ruh tang marwei khlem da wanrah wat hapoh ka Kynhun Myntri ruh wat la nga dei u Myntri ha kato ka por jong u Dr Mukul ruh u khlem wanrah ban ïoh ka jingmynjur lang hynrei u phah hi marwei sha ka Assam” ong u bah Prestone Tynsong.
U la ïathuh “ Mynta ngi kwah ban sdang sa ka Wat Ba ar ban ïakren namar ki bor synshar na ka Block I, Block II, Khanduli, Psiar, ki wan bad kyrpad ïa ka sorkar ban sdang noh ka jingïa pynbeit pud ha kine ki jaka ba sah namar ki la ngiah hi shoiñ bad ki kwah ban shai kdar haduh hangno u pud jong ka Meghalaya bad hangno u pud jongka Assam. Kumta ynda ki ar myntri rangbah ki la ïa rai ban sdang noh ïaka jingïapynbeit pud kaba ar hangne keiñ ngin sa sdang noh bad nga kyrmen ruh ba kan ym slem shuh”.
