Da lei lei ruh ka sorkar kam dei ban ai ïa ka jingdawa ki Harijan ka aiñ kam shah : Paul

Shillong, Iaiong 28 : Da lei lei ruh ka sorkar kam dei ban ai ïa ka jingdawa jong ki Kharmetor namar ka sorkar kam lah ban ai khyndew ne jaka sha uba trei hapoh jongka. Kaba ka sorkar ka lah ka long tang ban ai ïa ki jaka sah ne quarter katba ki dang trei bad ka sorkar, ong u MDC ka Jaiaw uba long ruh u EM ka KHADC bad President ka UDP Shillong City.
Haba ïakren bad u Mawphor u bah Paul u la ong “ Ym tang ba ym bit ban ai hynrei wat ka Land Transfer Act ruh kam shah da lei lei ruh ban ai jaka sha kiwei ki jaidbynriew. Ka don ruh sa kawei ka aiñ kata ka Meghalaya Public Premises (Evition From) Act 1980 bad kane ka la kren shai kdar ba haba ka sorkar ka la donkam ïa ka jaka ne khyndew na ka bynta ki paidbah ka lah ban shu kyndang beit naphang ïa kiba sah ha kum kata ka jaka”.
Nalor kane ula ïathuh ïa ka jaka ba sah ki Kharmetor la donkam da ka sorkar naduh u snem 2006 ban shna ïa ka Fly Over naduh Raps Mansion ban ïaid ter ter na High Court, Lum Survey ka ban ktah ïaka jaka ki shipai bad poi beit ha Them Metor. “ Halor kane ha u snem 2006 mynba nga dang long u Myntri ka tnad Urban Affairs bad Municipality nga la ïa kynduh ia u A.K Antony uba dei u Myntri kam ïada ri ha kato ka por bad la ïakren bad u ban ai jaka na ka jaka ki shipai haduh 10 acre bad shna ia kane ka fly over. Ha ka jingshisha la dep ïa beit namar ka sorkar pat kan ai ïa ka thie ka jaka ha Damsite kumba 8 acre ei ei kato ka Water Sport ba ki shipai ki pyndonkam hi mynta ba kan long ka jongki. Halor kane na ka liang u Geonka bad u bah Modrina lei lei kila dep shim ïa ka bai jaka puta na ka sorkar ruh hynrei katei ka kam ka la sahteng noh. namar ka jingïeng pyrshah uwei u MLA jongka Congress ha kato ka por”.
Kane ka jaka ha Them Metor ka dei jongka sorkar na ki kot ki sla ba la pynshisha lait noh tang ka ïing skul badka ïing mane ba u Syiem Hima Mylliem u la die sop sop ïa ki. Kumta ka sorkar ka don ka hok ban shim ïa kathie ka jaka bad ai ba kata ka jaka ba ki thied na u Syiem Mylliem ai kan mat neh sha ki ruh kam pher, ong u bah Paul.
Kumta u la ong biang “ Ka jingdawa jongki ka long shaba palat pud bad ym don aiñ ban ai jaka ïa ki da lei lei ruh bad ka sorkar kam dei ban sngap ïa kane ka jingdawa jongki. Ka sorkar ka dei ban pynkhie im biang ban shna ïa katei ka Fly Over kaba la dep survey bad ban pynpoi beit haduh katei ka Them Metor”.