Da lei lei ngin nym shah ba ka SAI Computer Ltd kan sam bording ha Mawsynram Sub Division

Mawsynram, Rymphang 17: Ka Synjuk ki Khlieh Nongsynshar Shnong bad ki Kynhun Sengbhalang ba kynthup ïa ka FKJGP, KSU, HNYF bad HYC jong ka Mawsynram Block ha ryngkat ki nongkitkam Shnong na ka Area Mawphlang Lyngkien bad Ranikor mynta ka sngi ki la shim ïa rai ba da lei lei ruh em ngin nym shah ïa ka SAI Computer Limited ba kan shimti ïa ka jingpynïaid ïa ka kam sam bording ha Mawsynram Sub Division.
Katei ka rai ka mih hadien ka jingïalang paidbah ne ka General Meeting ba la long mynta ka sngi ka 17 tarik u Rymphang, 2026 hapoh Dorbar Hall Mawsynram Dongrum. Ym tangkata ha kane ka jingïalang ki la pynpaw ruh ba ki pyrshah jur ïa ka rai jong ka sorkar ban aiti ïa ka kam sam bording sha ka SAI Computer Limited. “Watla hadien ka jingleit ban ïa kynduh ïa u Myntri Sorkar ba dei peit ïa kam bording ryngkat ïa i Deputy Commissioner ha kaba kane ka kynhun ka la shim biang ïa ka sienjam ban nym ailad syndon ïa kane ka kompany ban shimti ïa ka kam sam bording”, ong ka Synjuk.
Shuh shuh la ong ruh ba ha kane ka jingïalang ki la shim ruh ïa ka rai ba lada ka sorkar kam pynsngap ïa ka jingdawa ne pynsngew jong ka synjuk, na ka liang jong ki kim banse ban shim sa da kiwei pat ki sien jam la ka dei ban pynlong jingïakhih ne wat da kaba hap ban mih paidbah ruh ka synjuk kam banse ban leh ïa kata ka bynta.
Ha kane ka jingïalang, la donlang naduh u bah Hiamdor Rapsang uba dei u Chairman ka Synjuk ki Khlieh Nongsynshar Shnong Mawsynram Block, u bah Kyrmen Shangdiar uba dei u Secretary Synjuk ki Khlieh Nongsynshar Shnong Mawsynram Block bad kiwei de ki Rangbah Shnong Dangar, bad ki nongïalam jong ki sengbhalang bapher bapher.