Nongpoh, Lber 30: Ka HYC Ri Bhoi District ha ka 25 tarik Bnai Lber ka la hiar sha ki thaiñ nongkyndong ban kner jingïarap sha ki khynnah skul ba wan na ka longiing ba duna ka ioh ka kot bad kane ka long shi bynta na ka jingangnud ka seng ban kyntiew ïa ka pule ka puthi ha Ri Bhoi District.
Ha kane ka sngi la ïa don lang da u samla JaysonLlennox Nongrum kum u Kongsan, bad la synran lang ruh da ka jingdon lang u Samla Tony Shylla Publicity Secretary ka seng ha Ri Bhoi, u Samla Donbok Maiong, President ka Lai shnong unit, Rangbah Shnong ka Umbi, ki nonghikai jong ki 3 tylli ki skul lem bad kiwei kiwei ki dkhot ka Seng.
Kum ka seng ka sngew myllung ban ioh sngew ba wat ha kane ka juk ba mynta ki dang bun ki longiing ki bym lah ban kyrshan skul ïa ki khun namar ba ban ka jingduk bad kum ka seng ka angnud ban dang kne ki jingïarap khamtam na ka bynta kito ki khynnah kiba donkam hok shisha ka jingïarap.
Haba ai jingkren ha kane ka sngi, ki nonghikai jong kine ki skul ki la ïathuh ba bun na ki khynnah ki don Kopi tang kawei bad ka long kaba eh ban thoh ïa baroh ki sobjek tang ha kawei ka kopi
Haba ai jingkren u Samla Jayson u la pynpaw ka jingsngewkmen ban ioh shim bynta ha katei ha sngi bad ban ioh tynrong ïa ki jingeh ki skul kiba don ha ki thaiñ nongkyndong.
Na ka liang ka Seng ha kane ka sngi ka la synñiang ïa ki 360 tylli ki kopi, pencil kit bad white/green board sha ki 62 ngut ki khynnah skul jong ka Umbi-Mathan RCLP Skul, Nongthymmai LP Skul bad Umjari LP Skul.
U Samla Jayson u la pynpaw ba ka ri bhoi ka wan ha ka kyrdan ba hakhmat haba ïadei bad ka thoh ka tar ha ka jylla wat hapdeng ki ba bun ki jingeh ba ka ïa kynduh kane ka pynpaw ba ki nongshong shnong ki long kiba stad bad kiba trei shitom. Ka seng kan ïai kyrshan ïa ki skul hapoh ka district kat ha I bor ba lah namar ka seng ka sngewthuh shai ba dei tang lada ngi biang ka jingnang jingstad ngi sa lah ban ïaleh pyrshah ïa ki kam pyntroiñ ïa ka jaitbynriew, u la pynpaw.
