Nongpoh, Nailar, 24: Kum ki samla kiba don ha ka kynhun saiñ hima sima ha kaba ki ju shakri bad phai khmat kyrpang na ka bynta ki kam pynroi ki paidbah, ka Umroi Block National Youth People Front (NPYF), Raid Madan Kyrdem Area ha ka sien kaba nyngkong ka la phai khmat ruh ban ïarap kyrpang ïa kito kiba don ka jingduna ha ki dkhot met.
Ha ka jingïalam u President ka Umroi Block National Youth People Front, Kyrdem Area, u Bah Pysnkhemborlang Sun ha ryngkat ka jingdon lang u Secretary u Bah Lumlang Lamarai, u President ka Umroi Block u Richard Sing Lyngdoh bad u Secretary u Bah Sebestian Shadap, ha ka sngi Saitjaiñ ki la ban sam haduh 6 tylli ki Wheelchair na ka bynta kiba don jingduna ha ki dkhot met bad kiba dei kiba shong ba sah ha ki shnong ba hap ha ka Raid Madan Kyrdem.
Ha kane ka sngi, na ka liang ka NPYF, ka la sam ruh da ki shatri sha ki khynnah skul ka Wahlyrnei L.P School ha ryngkat kitei ki Wheelchair sha kito kiba don jingduna ha ki dkhot met bad kiba jynjar ha ka leit ka wan.
Ïa kitei ki Wheelchair la wan ban sam da u President ka State NPYF bad u MLA ka Jowai u Bah Wailadmiki Shylla kum u kongsan bad u MLA ka Umroi u Bah Damanbait Lamare kum u symbut kongsan ha ka jingïalang kaba la long ha ka sngi Saitjaiñ ha ka Shnong Kyrdem.
Haba sam ïa kitei ki Wheelchair sha kitei kiba don ka jingduna ha ki dkhot met la don ryngkat ruh u Sirdar ka Raid Madan Kyrdem u Bah Pholning Makdoh, u Rangbah Shnong ka shnong Kyrdem u Bah Pynhun Mawroh lem bad kiwei kiwei ki rangbah shnong bad ki nongïalam shnong ha ryngkat ki riew rangbah na ka thaiñ Raid Madan Kyrdem.
Ha kane ka sngi, na ka liang kitei ki nongïalam kata naduh u Bah Wailadmiki Shylla bad u Bah Damanbait Lamare kum ki nongmihkhmat, ki la ai ka jingïaroh ïa ka NPYF Raid Madan Kyrdem Area kiba la shim ïa kane ka sienjam ban ïarap kyrpang ïa kiba don jingduna ha ki dkhot met bad ki la kular ruh ban dang ïatrei lang ym tang ban peit ïa ki kam pynroi hynrei ban phai khmat kyrpang ruh sha kito kiba shem jynjar bad kiba duk ba kyrduh ha ka imlang ka sahlang.
