Da ki Unit pynkhlaiñ ka RBYF ïa ka jingshakri ha ki shnong khappud ban peit ïa ka jingeh ki paidbah
Nongpoh, Nohprah 06: Kum kawei ka seng kaba shakri kyrpang na ka bynta ki paidbah ka them Ri Bhoi ha ka jylla, ka Ri Bhoi Youth Federation (RBYF) mynta ka sngi ka la lah ban pynskhem sa ïa ki nongïalam ka RBYF Umtyrnga Unit, kaba dei kawei na ka shnong kaba don ha khappud ka Meghalaya bad ka Assam.
Kane ka jingpynskhemm ka seng RBYF ïa ki nongïalam ka RBYF Umtyrnga Unit, ka dei ruh hadien ba la ka dep ban pynskhem ïa ki nongïalam ka RBYF Killing Unit, Baridua Unit bad Khanapara Unit, ha kaba mynta ki la pynkhlaiñ sa ha Umrtyrnga Unit khnang ba ki nongïalam ka seng kin phai khmat kyrpang ïa ka jingeh jong ki paidbah ha kitei ki shnong khappud.
La pynlong ïa kane ka jingïalang ban pynskhem ïa ki nongïalam ka RBYF Umtyrnga Unit ha ka Shnong Umtyrnga mynta ka sngi, ha kaba la don lang naduh u Bah Wanpher s Wahlang – publicity and information secretary, u Bah Bawan Marwein – Finance Secretary, u Bah Never Makdoh, Sports Secretary, u Bah Rishan Nongri Assistant Education Secretary bad ryngkat ka jingdon lang u Rangbah Shnong ka Umtyrnga u Bah M. Marbaniang.
Kine ki nongïalam ba thymmai ka RBYF Umtyrnga Unit ki kynthup ïa u President ba la jied ïa u Bah Probinus Nongrum, Vice President Mashkula Pyngrope, General Secretary Teishon Kshiar, Assistant Secretary Johnry Tangsang, Finance Secretary Ricky Lyngshiang, Sport Secretary Kyrshan Khongjoh lem bad kiwei kiwei de.
La pynskhem bad pynbam smai ruh ïa kine ki nongïalam ka RBYF Umtyrnga Unit da u Bah Wanpher S. Wahlang uba dei u Publicity cum Information Secretary ka RBYF ha ka jingdon lang kitei ki nongïalam na ka seng kmie.
Haba ai jingkren ha kane ka sngi, kitei ki nongïalam ka RBYF ki la pynpaw ba ka jingangnud ka seng ban pynkhlain ïa ka jingshakri da ki unit ha kitei ki shnong khappud, ka dei ka thong jong ka seng ban ai jingïada kyrpang ïa ki paidbah nongshong shnong kiba don ha ki shnong khappud.
Shuh shuh, ki la bynrap ruh da kaba ong ba ka seng ka khmih lynti ba da ka jingdon kine ki nongïalam ka Unit kin peit kyrpang ruh ïa ki paradoh ki para snam ha kitei ki shnong khappud, namar na ka por sha ka por ki paidbah ki juh shah thombor ha ka jylla Assam namar ba ki don syndah bad ka jylla Assam.