Nongpoh, Jymmang 31: Kum ka jingïarap ïa kito ki longiing kiba donkam shisha ka jingïarap, khamtam ha kum kane ka por slap u Bah Charles Marngar MLA ka Mawhati mynta ka sngi hapdeng ka jinghap u slap u la sam da ki tin sopiing sha ki 575 tylli ki longiing na ki shnong bapher bapher ka Mawhati Constituency ha ka jingïalang kaba la long ha ka shnong Nongjri, Ri-Bhoi District.
U Bah Charles Marngar u la ong ba katei ka jingsam ïa kitei ki tin sopiing ka long na ka bynta kito ki longiing ba duk bad kiba donkam shisha ka jingïarap ha kaba kitei ki 575 tylli ki longiing kin ioh pdiang mar 3 ban ka tin ba kin ioh ban pyndonkam ban tap ïa ki iing ki sem khamtam ha kane ka por slap bala mang pisa ruh lyngba ka skhim SRWP jong u snem 2023-24.
U la ong ba kane kane ka jingsam tin yn dang bteng sa sha kiwei kiwei ki jaka ban aiti sha kito ki longiing kiba donkam shisha ka jingïarap.
