Jowai, Nailur 06: Kawei na ki kompani pynmih dewbilat kaba don ha Lumshnong East Jaiñtia Hills District ka Star Cement Ltd, hynnin ka sngi 8 tarik kala leit ban synñiang da ki tiar Sports kiba kynthup ïa ki Jersey, kibol bad ki boots sha ki rangïalehkai jong ka Dorbar Shnong Mukhla Mission West Jaiñtia Hills District.
Ha kane ka juh ka sngi katei ka kompani Dewbilat kala ai jingïarap ruh ïa ka Balang jong katei ka shnong da ki Dustbin shibynta ban wanrah ïa ka jingkhuid jingsuba lem bad ka song pisa, ha kaba la sam ruh ïa ki pla kot sha ki khynnah skul.
Kane ka jingai jingïarap jong katei ka kompani dewbilat ka long shi bynta na ka jingkyrshan lang jong katei ka Dorbar Shnong ban ïarap ïa ka kompani ban pynkit ïa ka machine heh jong ka Company ban jam shilliang lyngba katei ka shnong haduh ban da poi ha Lumshnong bad ïakei ka machine la pynkit haka lyngti kaba jngai eh.
“Kum kawei na ki kompani kaba don bynta lang ha ka imlang ka shalang, kumta kala siew kylliang ïa kane da kaba ai jingïarap ïa ka Dorbar shnong Mukhla Mission WJHD bad kumjuh ïa ka Balang kaba don ha katei ka jaka” la ong u Ranvir Sing.
Ha kane ka sngi la ïadonlang naduh u kongsan ma Wailadmiki Shylla uba dei u MLA ka thaiñ, u MDC ma Ailad Bhoi, u ma Emlangki Lamare MDC, u Waheh Shnong ma Esbison Bang, ki nongkitkam shnong bad ki nongshong shnong ka Mukhla Mission.
La ïathuh lyngba ka jinglah jong katei ka Kompany ban pynpoi ïa katei ka machine heh da ka jingïarap ka shnong Mukhla Mission, ka dang lah shuh shuh ban ai ka jingshakri kaba bha tam ha ka liang ban pynmih ïa ka Dewbilat kaba bha tam hapoh ka thaiñ shatei lam mihngi bad hapoh ka ri hi baroh kawei.
Na ka liang u kongsan ma Wailadmiki Shylla haba ai jingkreh ula ai ka jingïaroh ïa katei ka Kompany kaba la kloi ban ïarap ïa ka shnong bad u kyntu ba kane ka jingïatrei lang ka dang ïai bteng ha kine ki sngi ban wan.
Ula ong kum u Chair-man ha ka Environment Committee ka Meghalaya Legislative bad shem kin sa khot ïa baroh ki trai jong ki Kompany ban ïashong pyrkhat na ka bynta ka bha ka miat jong ka Mariang. Ula kyntu ïa katei ka company ba kan ïarap ban pynïoh kam ïa ki khun samla hakum kine ki sngi ba kyrdum kam.
U la pyntip ba ka shnong Mukhla kan sa ïoh ruh ïa ar tylli ki project ba la dep Sanction kata ban pynshna sawdong ïa ka madan phutbol Thad da ki Gallery bad sa kawei ka shnong kan ïoh jingïarap lyngba ka CSR Fund ban pynshan ïa kawei ka madan Futsal da u Artificial Turf bad kan long ruh ka lad kamai ïa ka shnong.
Ïa ka jingïalang la pynïaid da u Kingshok Borah ha phyllaw jong ka Mukhla Mission Non Government L.P School, katba ïa ki kyntien ai khublei la ïoh na u Tejbir Sing uba dei u Admimistrator ka Star Cement Ltd.
