Shillong: “Kum u MLA nga sngewdei ban ong ba nga hap ban peit ïa kiba bun balang, ym dei ïalade shimet bad ka kamram u MLA ka dei ban shna aiñ bad wanrah ïa ki polisi kiba biang,” ong u MLA ka North Shillong Constituency u Bah Adelbert Nongrum ha ka jingïalang ba la aiti ïa ki sound system cum musical instrument sha ka Lam Jingshai Choir, Mawkhar Parish ha ka jinglut baroh kaba T. 5,00,134.00 lak na ka skhiim MLA jong ka Special Urban Work Programme (SUWP) 2019-20.
U Bah Adelbert u la ong ba ka saiñ pyrthei ka dei ban saiñdur ïa ka lawei ki samla bad ka jylla ym dei ban saiñ dur ïalade ne ban pynkylla long ka kam khaïi.
“Nga sngewnguh ïa u Blei bad ki paidbah ka Constituency haba nga la ïoh pyrshang ban pyndep hok bad kitkhlieh khamtam haba ïadei bad ki skhim ba nga la ïoh bhah sha baroh katkum ki jingdonkam hapoh ka Constituency,” ong u Bah Adelbert.
“Wat lada nga don marwei ruh nga khlem ai daw hynrei nga la ïoh ban rah ïa ki mat jingdonkam hapoh ka Ïing Dorbar Thawaiñ ka jylla,” u la ong.
Lah ban pynkynmaw ba ka Lam Jingshai Choir, Mawkhar Parish ka la angud lah slem bha ban ïoh la ki Sound System bad ïa ki Musical Instrument kiba long katkum kane ka juk kaba mynta bad ha kane ka kynti ka jingphohsniew ka la wan urlong kumta ka Choir ka pynpaw ïa ka jingai khublei bad sngewnguh kaba kyrpang shi katdei eh ïa ka jingtrei shitom jong u MLA ban pynurlong ïa ka jingthmu.
