Shillong, Lber 24 : Da ka thong ban kyntiew ïa ka rep tit ha ka jylla bad khamtam eh ban kyntiew ïa ka ïoh ka koit jong ki nongshong shnong, ka sorkar Meghalaya lyngba ka tnad ka rep ka riang ka la thmu ban wanrah da ki mashin rep tit naduh Japan.
Ïa kane la pynpaw da u Myntri ka tnad ka Rep ka Riang, Bah Banteidor Lyngdoh haba kren bad ki lad pathai khubor hadien ka jingkynduh ïa ka kynhun na Japan ha kamra treikam jong u ha Meghalaya Secretariat.
‘Ka jingïakren ka long kaba sngewtynnad namar na ka liang jong ki ruh ki pynpaw ka jingkmen ban ïohi ïa ka jinglah jongngi ban pynbiang…..” U Myntri u la ïathuh ruh ba ka Mushroom Development Centre kaba don ha Upper Shillong kan sdang treikam naduh u Nohprah mynta u snem.” u la ong.
Katei ka kynhun na Japan ka kynthup naduh First Secretary jong ka Japan Embassy, Watanabe bad CEO jong ka YATS corporation, Y. Ito.
Kumban shu kdew hangne, ka sorkar jylla ka la dep ruh ban soi ïa ka soskular (MoU) bad ka YATS Corporation jong ka Japan ha u 2019 na bynta katei ka rep tit.
Napdeng ki tit baroh, u tit Shiitake ha Japan u dei u kynja tit ba ki nong East Asia ki sngewtynnad bha ban bam bad u dei ruh uwei na ki tit ba ki nong Asia ki bam. La ong ruh ba la ju tip ruh ïa utei u tit kum kynja jingbam ba don ki kynja dawai tynrai.
“Ïa ki mashin ban pynmih ïa kitei ki tit yn wanrah naduh Japan bad ban pyndonkam ia kitei ki tiar la phah ïa ki nongrep tit ban leit shah hikai sha Japan. Ngi kyrmen ruh ba kane kan pynjur ïa ka jingpynmih ïa kitei ki kynja tit Shiitake kiba don ka jingdawa kaba jur bha,” ong u Myntri.
Katkum ka jingong jong u, ka jylla kan pynmih kumba 150 ton utei u tit bad la kumno kumno 400 ton ha ki lai snem katba ka jingpynlut na ka bynta jong u kan long kumba 4.5 klur tyngka.
Ïa utei u tit la ju thung ha ki jaka ba ka jingshit jingkhriat ka long hapdeng 10 degree Celsius bad 28 degree Celsius bad kumta ka Meghalaya kadei ka jaka kaba paka tam ban thung kham bun ïa kitei ki kynja tit. La ong ruh ba ka jaka kaba paka tam ban thung ïa ki kadei ha ki kynja dieng sohot bad diengïap lok.
La ong ruh ba ka dor jong u tit budam bad tit Oyester kim da dei kiba lahdor katba ka dor jong u tit Shiitake pat ka poi kumba 1200 tyngka shi kilo.
Shwa kane, u Myntri u la ïathuh ba ki nongrep ha ka jylla ki la kiew stet mynta haduh kumba 1500 ngut na ka 200 ngut kiba don ha shwa u snem 2018.
