Da ki tiar ïoh kiba thut dkhot met ha East Jaiñtia Hills, dang ïaid sha khmat ka jingjurip
Khliehriat, Nailur 18: Ka Pt. Deendayal Upadhyaya National Institute for Persons with Physical Disabilities (Divyangjan), New Delhi, ha ryngkat ka jingïatreilang bad ka SAKSHAM kaba hapoh ka Ministry of Social Justice and Empowerment jong ka sorkar India, ka National Institute For Locomotor Disabilities ((Divyangjan), Kolkata, lem bad ka ophis u Deputy Commissioner ka East Jaiñtia Hills District, ka ophis jong ka District Social Welfare EJHD ryngkat lang ruh bad ka Kyrmen Foundation hynnin ka sngi ka la pynlong ïa ka prokram ba kyrpang ha Jaiñtia Eastern College Khliehriat ha kaba la sam ei ïa ki tiar ba donkam sha kito ki briew kiba kyrpang kiba don jingduna ha ki dkhot met, la khot ïa ki ba ki dei kiba kyrpang namar ha kiba kum kine ki briew ki don ka sap kaba kyrpang bha kaba u Blei u la pynkup ha ka jingim jong ki.
U myntri ka sorkar jylla, uba dei ruh u MLA jong ka Khliehriat, u bah Kyrmen Shylla, u la long kum u kongsan ha kane ka sngi, ha kaba u la pynpaw ka mynsiem jingieid bad jingsnewlem ïa kine ki briew kiba kyrpang bad ong ruh ba kine ki dei shisha kita ki nongshong shnong kiba don ka sap kaba kyrpang ha ka jingim jong ki bad kiba donkam haduh katta katta ïa ka jingkyrshan ba kyrpang ban kyntiew ïa ka sap jong ki bad ruh ban kyrshan ïa ki ha baroh ki liang.
U Deputy Commis sioner, East Jaiñtia Hills District, u Abhilash. Baranwal, IAS, u la pynsgew ba ka ophis u Deputy Commissioner ha ryngkat ka jingïatreilang bad ka tnat Social Welfare ka la ïaid shakhmat bha mynta ha kaba wad bniah ïa ki briew kiba kyrpang, kiba don ki jingduna ha ki dkhot met kiba don hapoh ka district bad shen yn sa lah ban pyndep ïa kane ka jingwad bniah da kaba ïaid jurip ïa ki longiïng kiba don hapoh ka district, u la ïathuh ruh ba ïa kane ka jingjurip la leh da ki briew kiba la tip bha (Trained Community Based rehabilitation Workers) bad ka Multipurpose Rehabilitation Workers (MRWs) ba la lam khmat da ka ophis jong ka District Social Welfare Officer bad kat haduh mynta la lah ban pyndep haduh 122 tylli ki shnong bad la lap haduh 872 ngut ki ba don jingduna ha ki dkhot met jong ki bad mynta ka jingjurip ka dang ïaid shakhmat.
U A.Banarwal, u la ong ruh ba hadien ba la pyndep ïa ka jingjurip ka ophis u Deputy Commissioner ryngkat bad ka tnat District Social Welafre East Jaiñtia Hills District kan sa pynlong ïa ka jingiakynduh lang lane ka camp jong baroh kito kiba don jingduna ha ki dkhot met bad ïa kane ka jingïakynduh lang yn pynlong ha ki shiphew tylli ki jaka bad yn ai sha ki ïa ki UDID Card, kumjuh ruh ïa ki syrnot, ban pynioh ha ki ïa ki jingmyntoi kum ka CM Special Assiatance Programme bad ka bai bam lane ka Pension bad yn pynkup burom ruh ïa ki da ki jingioh jingmyntoi. U la pynsngew ruh ïa kawei ka kam lane ka policy ba ki bor synshar district ka East Jaiñtia Hills District ka la lah ban leh na ka bynta kito kiba don jingduna ha ki dkhot met ha kaba kane ka policy kan neh bad kan nym kylla shuh, ka ban long ka jingmyntoi ïa kito kiba don jingduna ha ki dkhot met.
Kiba la ai jingkren ki kynthup ruh u Secretary jong ka SAKSHAM, u Mithun Roy, u P&O jong ka National Institute for Locomotor Disabilities ((Divyangjan), Kolkata, u Tarun. K. Verma, u Deputy CEM ka JHADC, u bah Lasky Rymbbai, ka District Social Welfare Officer East Jaiñtia Hills District, ka kong R.Pasah bad kiwei kiwei.
U bah Kyrmen Shylla, u Abhislah Banarwal lem bad ki heh sorkar, ki MDC ka thaiñ, ki la aiti ïa ki tiar ba donkam (Aids and Appliances ) kum ki shuki- Wheel Chair, ki Artificial limbs, ki tiar ban iohsngew, ki Hearing Aids, ki diengduh ne ki Auxiliary Crutches, Walker, CP chairs bad ki Smart Cane sensors sha kito ki briew kiba kyrpang.