Shillong, Risaw 25: Ka Dalmia Bharat Foundation Promotes Kitchen Garden (DBFPKG) kaba dei kaba la sdang ban pynkupbor ïa ki longïing ha ki thaiñ nongkyndong kiba don ha East Jaiñtia Hills ka la sdang ban shim khia ha ka ban kyntiew ïa ki nongshong shnong ha ki shnong nongkyndong lyngba ka jingkyntiew ïa ki sap bapher bapher bad ki kam ki ban pynneh ïa ka ïoh ka kot. Ka Dalmia Bharat Foundation (DBF), kaba dei ka shnat ka Corporate Social Responsibility (CSR) jong ka Dalmia Cement (Bharat) Ltd (DCBL) ka la plie ïa ka jingsdang ban kyntiew ïa ka ‘kitchen gardening’ hapdeng ki longïing hapoh East Jaiñtia Hills.
Lyngba ka jingïatreilang bad ka Meghalaya Rural Livelihood Society (MSRLS), na ka liang ka DBF ka la sam ïa ki 11 jait ki symbai jong ki jhur kum u kajor, sohlakum, Mustard Greens, Coriander, bad kiwei kiwei sha ki 124 tylli ki longïing jong ki 9 tylli ki shnong. Haba khmih ïa ka jinglong ka jaka kaba biang bha ban rep ïa u jhur Rabi uba ju rep katkum ka aïom, kane ka project ka thmu ban kyntiew ïa ka jingïoh ka bam kaba tei met bad ka jingkiew ha ka ïoh ka kamai jong kiba ïashim bynta. Palat 75% na kiba ïoh myntoi ki dei ki longkmie, da kaba buh ruh ïa ka thong jong ka DBF ban pynkupbor ïa ki longkmie bad ban kyntiew ïa ki lad kamai jong ki.
Kane ka jingsdang ka kynthup ïa ka jingai jinghikai halor ka kitchen garden ka jingleh kaba long katkum ka juk saïan ban pynthikna ïa ka jingpyntreikam kaba ïaid beit bad ka jingmih kaba bha. La khmih lynti ba manla kawei kawei ka longïing kan kamai hapdeng ka T. 15,000 haduh T. 25,000 na ka jingdie ïa ki jhur ba dang paka ka ban lam sha ka jingpynbiang ïa ka kam bad ka jingkiew ha ka ïoh ka kot.
Haba kren ha kane ka prokram u Raju Ranjan Prasad, Unit Head – Meghalaya, DCBL u la kdew, “Ka jingpynkupbor ïa ki longïing ha nongkyndong lyngba kane ka lad ka ban neh slem ka dei ka sienjam kaba donkam khnang ban lah tei ïa ki longïing kiba shaniah hi halade. Kane ka jingsdang kam dei tang ban kyntiew ïa ka jingpynbiang ïa ka bam bad ban kyntiew ïa ka kamai kajih sha ki longïing, khamtam ki longkmie kiba dei u budlum jong kine ki ïing. Ka Dalmia Bharat ka buh ïa ka thong ban ïatrei ryngkat bad ki shnong bad ki nongshong shnong ban kyntiew ïa ka ïoh ka kot jong ki.”
Ïa kane ka jingsam bad ka prokram ai jinghikai la plie ha ka jingdon u rangbah shnong Sonapyrdi, ka Cluster Coordinator and Project Executive Farms jong ka MSRLS, bad ka kynhun ka DBF’s CSR. Kane ka jingsdang ka dei shibynta na ki jingpyrshang ka DBF ban nohsynniang sha ki thaiñ nongkyndong kaba ïaid lang ruh bad ka United Nations Sustainable Development Goals (SDGs).
