Nongpoh, Naitung 03: Ban pynneh pynsah ïa ki dohkha dohpnad bad ki kynja dohum kiba don ha ki wah bad ruh ban pynneh pynsah ïa ka riti ka dustur ka Raid Ïapngar ha Ri Bhoi, ka Synjuk ki Seng Samla Raid Ïapngar ha ryngkat ka kynhun ki Samla na Ri Bhoi ba la tip kum ka Young Minds ha ka sngi Saitjaiñ ki la leit ban pynlait ïa ki symbai Dohkha ha ka Wah Umtung kaba don ha u pud u sam ka Raid Ïapngar ha Ri Bhoi.
Ïa kane ka jingpynlait symbai Dohkha la lamkhmat da ka Synjuk ki Seng Samla Raid Ïapngar bad ka Young Minds kaba dei ka kynhun ki samla na ka thaiñ Ri Bhoi bad la kyrshan lang ruh naduh ka Raid Ïapngar lyngba ki Basan ka Raid ba la mihkhmat da u Bah N.S Rymbai kum u Basan ka Raid Ïapngar, u Basan khynnah ka Raid, u Bah Pynlang Rymbai, u President ka Shisur United, u Bah P.R Madur, u Bah Isynei Hinge, President ka Young Minds, u Samla Mardondor Shadap, Adviser ka Young Minds, u Chairman ka Synjuk, u Samla Kyntiewnam Lamare, u Secretary, u Samla Elbirth Roni Ramde bad kiwei kiwei ki nongïalam ka Synjuk.
Kumba la pynpaw ha katei ka sngi, ka jingthmu ba la pynlait dohkha ha katei ka wah Umtung kam dei satia tang ban pynneh pynsah ïa ki dohkha dohpnat kiba don ha katei ka wah bad ka long ruh shi bynta na ka bynta ka riti ka dustur ka Raid Ïapngar ha kaba mynta ki ri ki sumar ïa katei ka wah bad shisien shi snem la pynlong ïa ka jingtong doh ha katei ka wah kaba dei shi bynta ka riti ka dustur jong ka Raid Ïapngar.
Haba kren ha kane ka snig, u Samla Mardondor Shadap, Adviser ka Young Minds u la pynpaw ka jingsngewkmen ba ka Synjuk ki Seng Samla Raid Ïapngar rygnkat ka Raid ki don ïa kata ka mynsiem ym tang ban pynneh pynsah ïa ki Dohkha dohpnat bad kumjuh ruh ba ki don kata ka thong ban pynneh pynsah ïa ka riti ka dusture bad kum ka Young Minds ruh ka ai jingïatrei lang ka long na ka bynta ban ïa trei lang ban wan rah ka jingïatylli ban trei na ka bynta ka bha ka miat jong ka imlang ka sahlang.
U la ong ruh ba ka Young Minds ka shim ïa kane ka sienjam ban ïarap da ki symbai dohkha ka long shi bynta ban pynneh pynsah ïa ki dohum kiba don ha katei ka wah bad kumjuh ruh ban kyrshan ïa ka Raid Ïapngar ba kan dang lah ban pynneh pynsah ïa ki riti ki dustur kumba la ïalam da u mynbarim.
Shuh shuh, u la bynrap ruh ba ka Young Minds ka dang ai ka jingïatrei lang bad ka Synjuk ki Seng Samla ka Raid Ïapngar bad kumjuh ruh bad ka Raid, namar dang don shibun ki kam ba ngi dang hap ban trei na ka bynta ka bha ka miat bad ka roi ka par jong ki paidbah hapoh katei ka Raid ba kaba kham kongsan ka long ban don ka jingïatrei lang na baroh ki liang, u la bynrap.
