Da ki spah ngut wan tuid ki paidbah sha ka jingsam dawai ei ba la pynlong da ka KSU-EJHDU ha Khliehriat

Khliehriat jylliew 12: Da ki saph ngut ki paidbah nongshong shnong kiba na Khliehriat bad na ki shnong ba mar jan ki la ïa wan ban shim dawai bad leh ïa ki medical check-up kaba ym donkam ban siew pisa ha ka prokram sam dawai ei ba la khot pynlong da ka Khasi Students Union East jJaiñtia Hills District Unit hynnin ka sngi kaba la pynlong ha Khliehriat West Community Hall.
Haba kren kum u kongsan, u myntri ka sorkar jylla, u bah Kyrmen Shylla uba dei u nongmihkhmat ka thaiñ, u pynpaw ka jingsngewnguh ïaka kynhun jong ki doctor bad ki nurse kiba na Downtown Hospital bad kumjuh ruh ïaka KSU East Jaiñtia Hills District Unit kaba la shim ïa kumne ka sienjam kaba radbah hapoh ka district, u la pynpaw ruh ba hadien ba la khangdam noh da ka National green tribunal ban tih ïa u dewiong ka la long ka jingban khia kaba jur shisha ïa ki paidbah jong ka district kaba la ktah ïa ka kamai kajih ha ka ioh ha ka kot bad ha teng ki paidbah kim don pisa satia ban thied wat ïa ki dawai ruh, u la pynpaw ka jingsngew kmen bad sngew nguh ïa ka KSU bad ka Downtown Hospital kiba la shim ia kane ka sienjam ban ai ka jingshakri sha ki paidbah ka thaiñ, u kyntu ïaka seng ba kan dang ïai trei shitrhem ha baroh ki liang na bynta ka bha ka miat jong ki paidbah, u la pynpaw ruh ba na ka liang jong u kum u nongmihkhmat un iai don ha syndah bad ka seng kumjuh ruh bad ki paidbah ha kino kino ki jingeh.
Kawei ka jingmyntoi kaba kongsan ba ki paidbah kiba wan shim dawai ki ioh ka dei ba ki ioh ruh ïa ki card kaba kyrpang kiba na Downtown Hospital Assam, ba lada ki leit ban shim dawai ne phah sumar ha katei ka hospital yn pyn duna dor ïa ki haduh 10% na ka dor ba ki dei ban siew, kaba dei ka bai dawai bad ka jaka sah.
U General Secretary jong ka KSU East Jaiñtia Hills District Unit, u bah K.S.Suchiang, u la ai khublei ïa ki paidbah kiba la wan sha kane ka jingsam dawai ei ba la pynlong da ka seng bad ai khublei ruh ïa ki doctor bad ki nurse jong ka Downtown hospital Guhati Assam kiba la kloi ban wan ban ïa shim bynta lang ha kane ka jingsam dawai ei ba la khot pynlong da ka seng, ka seng ka ai khublei ruh ïa u bah Kyrmen Shylla, MLA ka thaiñ, u Waheh Shnong Khliehriat West, u ma Langmon Bareh, u bah Justine Dkhar, MLA barim jong ka Khliehriat Constituency bad kiwei kiwei ki riew rangbah.
Ha kajuh ka por, ka seng ka pynpaw ïa ka jingsngew nguh ruh ïa ka jinglah ka Downtown Hospital ban pynbit pynbiang ïa ki dawai bad ki jing ai jingsumar kaba la pynlong ïa ka prokram kaba iaid beit, ïaid ryntih haduh kaba kut, kawei kaba ka seng ka sngew nguh eh ïa ka Downtown Hospital ka dei ka jing ai sngewbha ïa ka Crad kaba kyrpang ïa ki paidbah nongwan shim dawai, ha kaba ka hospital kan shim duna dor haduh 10% lada ki leit sumar ne shim dawai na katei ka hospital bad ka jingpynbit pynbiang ïa ki jaka sah.
Ha kajuh ka por u bah K.S.Suchiang u la pan map na ki paidbah jong ka thaiñ ioh haleh ka don kano kano ka jingduna, u kyrpad ïa ki paidbah ba kin nym thew ïa ki jingduna namar ba kane ka dei ka sien kaba nyngkomg eh ba ka seng kan pynlong kum ïa kane ka prokram bad ong ruh ba ka seng kan sa nang ïai bteng shuh shuh ïa kum kine ki prokram ha kiwei kiwei ki por ruh bad ka seng kan pyrshang ban pynbit pynbiang kham bha shuh shuh kaba katkum ka jingdonkam bad jinghun ki paidbah.
Katba ka sur kaba mih na ki paidbah pat ka dei ka jingsngew nguh ïa ka KSU East Jaiñtia Hills District kaba la pynlong ïa kum kane ka prokram kaba don jingmut bad ong ruh ba ka prokram ka long kaba jop bad ki paidbah ki ai ka jingkitbok kitrwiang ïa ka seng ba kan nang ïai kiew shaphrang na ka por sha ka por ban nang lah shuh shuh ban ai ka jingshakri ïa ki paidbah solonsar.
Ki doctor kiba la wan shim bynta ha katei ka sngi ki kynthup ki doctor ENT, kiba dei ïa ki bynta ka skhor, khmut, ryngdang bad kumta ter ter, Paediatrics, ki ba dei ïa ki khyllung khynnah, u doctor Gynaecology, uba dei kyrpang ïa ki kynthei, Oncosurgey, ka ba dei ïa ka jingpang bampong (Cancer) bad ki M.D kiba dei ki doctor kiba sumar ïa kiwei kiwei pat ki jingpang.