Nongpoh, Lber 25: Ka party National People’s Party (NPP) hapoh ka jylla katba dang mih ki sngi shuwa ban poi noh sha ka sngi ban jied ïa kita ki nongmihkhmat na ka Shillong Parliamentary Seat sha ka Dorbar thaw aiñ ha Lok Sabha ka la dang ioh bor ioh bor na ki bynta jong ka them Ri Bhoi bad ïa kane la sakhi mynta ka sngi ba bun ki nongïalam na kiwei ki seng saiñ pyrthei ki la wan ban pynïasoh sha ka National People Party (NPLP) kaba la long mynta ka sngi ha Umsning.
Kane ka jingioh bor ka party NPP ha Ri Bhoi kum shi bynta ban pynkhlaiñ bor na ka bynta ka election MP sha Long Sabha, ka dei ruh mynta ka sngi ba ki nongïalam bad ki nongkitkam na ka party UDP bad Congress ryngkat ki nongkyrshan ka VPP party ki la wan ban pynïasoh ïa lade sha ka party NPP.
Kitei ki nongïalam ka UDP bad Congress kiba la wan ban pynïasoh sha ka NPP mynta ka sngi ki kynthup ïa u Bah Watson Kharkrang, Youth President ka UDP Youth Wing Umsning Circle, u Bah Rangkynsai Makdoh, Chief Adviser ka UDP Umsnig Circle, Delnes Pale, Vice President ka UDP Umsning Circle bad kiwei kiwei ki nongïalam bad ki nongïalam ka Congress pat ki kynthup ïa ki nongkyrshan ka Congress ha ka jingïalam u bah Shanbor Lyngdoh bad ka Kong Indaker Tariang.
Kumba la paw pyrthei kiba kham bun hi kiba la wan ban pynïasoh sha ka NPP ki dei ki nongïalam ka UDP nalor ki nongïalam bad ki nongkyrshan ka Congress bad VPP.
La pdiang burom ruh ïa kitei ki nongïalam bad ki nongkyrshan na ka party UDP bad Congress sha ka party NPP da u Bah Pynïaid Sing Syiem, Working President ka NPP ba dei ruh u CEM ka KHADC, u Bah Himalayan Shangpliang, Spokesperson ka NPP, u Bah Samlin Malngiang, Secretary Incharge ka NPP Ri Bhoi District, Bah Kitbor Nongrum State President ka NPYF, U Bah Clement Mawlong, President ka NPP Ri Bhoi, u Bah Jason S. Mawlong, President ka NPP Umsning, ka Kong Magdalene S Mawlong, MDC na ka NPP nalor kiwei kiwei kiba la mihkhmat na ka party NPP.
Haba ïa jingkren ha kane ka sngi, u Working President ka State NPP bad uba dei ruh u CEM Ka KHADC, u Bah Pynïaid Sing Syiem, u la pynpaw ïa ka jingkmen ba ki nongïalam ka UDP, Congress bad VPP ki la wan ban pynïasoh sha ka NPP party namar ka thong jong ka NPP party ka dei ban ai ka jingshakri na ka bynta ban kyntiew ïa ki paidbah hapoh ka jylla.
U la ong ruh ba ki paidbah kim dei ban shah ïalam bakla ha kaba bun ki nongïalam sain pyrthei kiba um kwah ban pynpaw kyrteng ki ju kynnoh ba ka NPP ka dei ka party kaba bamsap, hynrei kaba sngewlyngngoh ka long ba kim nud pat ban pynshisha ne ban ujor lada lap ba ka NPP Party ka bamsap ha kaba baroh ka dei tang ban ïalam bakla ïa u paidbah ka jylla.
U la ong ruh kumba ki la kynnoh ba ka NPP ka dei kaba bamsap bad ka jingbam sap kaba kham ma shuh shuh ka dei ka jingbamsam ban pynïalam bakla ïa ki jingmut jingpyrkhat jong ki paidbah ha ka jylla bad kum ka party NPP kan nym sngap ïa kita ki ñia kai bad ka bteng ban shakri na ka bynta ban wan rah ka jingkylla hapoh ka jylla.
Shuh shuh, u la kyrpad ruh ïa ki paidbah ka jylla ba kim dei ban shah ïalam bakla bad ki dei ban ai ka jingkyrshan ïa ka NPP party namar ka thong jong ka NPP party ka dei ban shakri sha ki paidbah bad ym ban shu ïa kawang ktieh ïa kiwei da kaba ïalam bakla ïa ki paidbah ha kaba haduh mynta ka NPP kam sngap ïano ïano ruh ba ka trei la kam ban wan rah kata ka jingkylla hapoh ka jylla hi baroh kawei, u la bynrap.
