Jowai, Rymphang 18: Da ki spah ngut ki samla ki bym pat don kam don jam napoh ka West Jaiñtia Hills District kila wan ïashim bynta ha ka prokam pynïoh kam (Recruitment Drive) kaba la long ha District Library Auditorium, Mynthong, Jowai mynta ka sngi 18 tarik bala pynlong da ka Meghalaya State Skill Development Society of MSSDS, Jowai.
U ma Lambor Suchen, Skill Development Officer ka MSSDS, West Jaiñtia Hills District, ula pynpaw ba ka thong ba hakhmat eh jong ka MSSDS ka long ban ai ïa ki jinghikai kiba pynshong nongrim ïa ki sap ki phong ïa ki samla kiba la pyndep ïa ki jingpule bad kumjuh ruh ïa ki samla kiba la pep skul. Ula ong ba kane ka jingthmu ka long ban ïarap ïa ki samla ban trei ha kam ba ki don jingmut halade.
Shuh shuh u bah Lambor u la pyntip ba kane ka prokram kan ïarap ïa ki samla ban ïoh kam ha kylleng ki bynta bapher bapher la ka long hapoh ka ri India bad shabar ruh kumjuh. Ula pyntip ruh ba ka ophis jong ka MSSDS ka don ka jingïatreilang kaba jan bad ka Germany, Japan bad Singapore ban pynsuk ïa ki lad ïoh kam ïa ki samla shabar ri.
Ula pyntip kiba samla kiba leit trei shabar ka ri (International) ki lah ban ïoh ïa ka tulop kaba sdang naduh Rs.90,000/- haduh Rs. 3,00,000/- tyngka shi bnai, katba kito kiba trei hapoh ka ri India ki lah ban ïoh ïaka tulop kaba sdang naduh Rs.18,000/ haduh 60,000/- shibnai katkum ka jingtbit bad ka sap jong ki.
Kane ka jingthmu ka long shi bynta na ka jingpyrshang jong ka sorkar ban ïaid shakhmat hapoh ka jingïalam jong u Myntri Rangbah ka Jylla shi bynta ban thaw ki lad ki lynti ïa ki samla ban pynïoh kam pymïoh jam.
Ki samla kiba la pynrung kyrteng nyngkong ïalade, kin sa ïoh jingbatai khambniah bad hadien ka interview katkum ka jingtbit jong ki ha ki kam kin sa ïoh lad ban leit trei shabar ha ki jaka bala jied kyrpang.
Kum kane ka juh ka programme yn pynlong biang lashai ka sngi 19 tarik ha Amlarem Sub-Division, Amlarem.
