Nongpoh, Nailar 17: Ki pulit jong ka Mawlasnai Police Outpost hynnin ka miet kila ioh ban kurup da ki spah litar ka kyiad pyrsi ba thmu shalan beaiñ, hadien ba ki pulit kila ioh bat ïa kawei ka kali Alto kaba don ïa u number ML 05 AB 7761 katba ki dang pynlong ka jingpahara miet haka thaiñ Umraiang.
Katkum ka khubor bala ioh lum naki pulit la ïathuh ba katei ka kali kadei kaba ki pulit kila don ka jingsuba ba ka kit kyiad bad haka jingtalasi kila lap ba katei ka dei shisha kaba kit kyiad bala thep haki byrni plastic ba thep khaw.
Ïa katei ka kali la ñiah da u Bah Tral Kurbah (41) naka shnong Madan Nongur naka thaiñ Sohiong.
Halor katei ka jingioh kurup kyiad naka liang ki pulit kila rah noh ïa utei u rangbah sha CHC Bhoirymbong ban pyndep ïaka jingeksamin bad hadien katei la rah noh sha Mawlasnai Police outpost ban bteng ïaka jingtohkit.
Naka liang ki pulit kila pynngat ruh ïa utei u rangbah haki kyndon aiñ ka ME Act namar ka jingshalan beaiñ ïaka kyiad.
