Nongstoiñ, K’lyngkot 23: Ka HYC Maweit circle lyngba ka kyrwoh khubor sha sorkar bad ka ophis ba dei peit ïa ka jingshna ïa ka surok na Nongstoiñ sha Maweit, ka kyntu ban peitngor bha khnang ba ki Contractor kan pyntrei katkum ka work order ïa ka surok Nongstoiñ Maweit.
U President ka HYC Maweit circle u Bah Jeremiïa Dkhar haba kren sha ki lad pathai khubor, u la ong ba ka seng ka kyntu ïa ki Contractor ba kin trei bha, khnang ba kin im ka kyrteng sah ka nam ba ka surok ba la sah khongreng la 50 snem tam ka da neh slem lyngba ka jingsiang rong bad ka jingtrei ka jong ki.
Ka seng ha ka kyrwoh ka kyntu khnang sha ka sorkar Jylla bad ki briew kiba don bynta lang, ba kin da theh kham bun ki kam pynroi ha ka thaiñ Maweit, kumba ki ïoh lum revenue da ki hajar klur na ka dong ka thaiñ Maweit. Baroh shikatta ki snem la khlong dewiong na kane ka thaiñ, la shalan kaba ka jingmih lada pynphyrnai tang ha West Khasi Hills ruh la thaba khrek naduh mynno.
Ka seng ka kyntu ruh ïa ka ophis ba dei peit ban mang pisa noh kloi bad ban sdang pyntrei noh ïa ka surok PMGSY na Risiang sha Riangpoit bad ka surok na Wahlyndoh sha Shyrkon A.
Ka seng ka kyntu ruh ban ai kham bun ki surok PMGSY sha ka thaiñ Maweit kum na Wahlyngdoh sha Diengsning, na Nongsba sha Umïang, na Nongpathar-Nonglyer sha Shyrkon A, na Maweit sha Pyndengshallang, na Mawmarin sha Langlieh bad kiwei de. Namar lada ïa nujor sha kiwei ki thaiñ ka thaiñ Maweit ka dang duna shaba palat ki kam pynroi.
Ka seng ka kyntu ruh ïa ka sorkar jylla ban pynïoh noh sa ïa ka surok na Maweit-Wahblei-Kulang shaduh Nongjri, ban pynïasnoh ïa ka thaiñ West bad South West, khnang ban pynïajan ïa ka ïaid ka ieng bad kan pynkmen shikatdei eh ïa ki paidbah na ar tylli ki thaiñ.
