Nongstoiñ, Jymmang 12: Ka Meghalaya New & Renewable Energy Development Agency (MNREDA) West Khasi Hills, hynne ka sngi ka la pynlong ïa ka jingialang ban sam ei ïa ki Solar Study Lamp sha ki khynnah skul jong ka District.
Ïa katei ka jingialang la pynlong hapoh Trysem Hall jong ka ophis DC, ha kaba u MLA ka Nongstoiñ Constituency u bah Macmillan Byrsat, u la long u kongsan ha ryngkat ka jingiadonlang u Deputy Commissioner ka District u P.D Sangma kum u symbud kongsan.
Ha kane ka sngi na ka liang jong ka MNREDA, ka la sam ïa kitei ki Study Lamp sha ki khynnah skul kiba pule naduh ka klas VIII haduh klas X, ha kaba ki 3 hajar ngut ki khynnah skul jong ki 15 tylli ki skul hapoh ka District ki la ioh pdiang ïa kitei ki Solar Study Lamp.
U MLA ka Nongstoiñ u bah Macmillan Byrsat haba ai jingkren kum u kongsan ha katei ka jingialang, u la pynkynmaw ïa ka juk kaba mynshwa ba ki khynnah skul ki hap ban pule kot da kaba pyndonkam da ka sharak, hynrei ha kane ka juk kaba mynta ka bording ilektrik ka la biang.
Shuh shuh u la ong ruh ba jingsam ïa kitei ki Solar Study Lamp, ka long kum shi bynta ban ïarap ïa ki khynnah skul, ba kin ioh ban pyndonkam ha ki por ba duh ka bording ilektrik, khnang ba ka jingpule jong ki kan nym thut bad dkoh.
U la pyntip ruh ba ka sor Jylla mynta ka la ïaleh ban phai khmat nyngkong sha ki skul sorkar, namar kiba bun hi ki skul sorkar ki dei kiba sniew kiba jot rathai bad kiba duna khynnah skul. Kumta ka sorkar ka la shim rai ban phai khmat shwa ban pynbha ïa ki skul sorkar ha baroh kawei ka Jylla.
Ha kane ka sngi la ïadonlang ruh ka District Project Officer ka kong Elizabeth Kharjana, u bah G.A Lyngdoh, ki nonghikai ki khynnah skul bad kiwei kiwei.
