Da ki samla shnong khot pyrshang ka Nongkseh ban mih madan ha Fourth Division, poi palat 50 ngut

Shillong, Rymphang 08: Ka Nongkseh United Football Club ha ka sngi Saitjain ka la pynlong ïa ka jingjied ïa ki nongïalehkai kiban mihkhmat ïa ka klob bad ka shnong ha ka Shillong Sports Association (SSA) Fourth Division League 2026 mynta u snem.
Kaba kham sngewtynnad ka long ba ka klob ka la plie lad shwa ïa ki samla na ka shnong Nongkseh kiba hapoh 20 snem ba kin wan pyrshang bad pyni ïa ka jingtbit jong ki ha kane ka jingïalehkai. Ha kane ka sngi ki la poi palat 50 ngut ki samla shynrang kiba wan ban pyrshang ha ryngkat ka jingwan sakhi lang ki kmie ki kpa bad ki bahaiing
Ka Nongkseh United FC kan mih kum ka kynhun na ka Nongkseh Sports Social & Cultural Club, ka kynhun kaba la ïoh ban rah ïa ka nam lahduh bad mynta ka la kiew syndon sha ka Shillong Premier League 2026.
Na ka liang ki bor pynïaid ki ïathuh ba ka sienjam ba ki shim ban pynmih sa ka kynhun jong ki samla rit ka long ban plie lad bad pynshlur ïa ki samla shnong ba kin phaikhmat sha kane ka jingïalehkai kaba lah ban ai kamai bad pynphyrnai ïa ka lawei jong ki da kaba sdang shwa na ka Fourth Division.
Ïa kane ka kynhun jong ki samla la kyrshan bad lamkhmat da u President ka Nongkseh SS & CC Bah Daniel Thangkhiew uba don ïa ka thong ban pyntbit, pynkhlain bad pynjanai ïa ka sap ïalehkai phutbol jong ki khun samla ka shnong khnang ba kin lah pat ban mihkhmat ym tang ïa ka jylla hynrei wat ïa ka ri ruh kumjuh.
Ïa kane ka kynhun yn ïalam da u Bah Richardson Nongneng kum u Coach ryngkat ka jingkyrshan lang u Bah Rogestar Basaïawmoit, katba i Kong Lucky Mary Marbaniang in don lang ha ka kynhun kum i physiotherapist.