Nongpoh, Nailar 04: Kumba 50 ngut ki samla kynthei bad shynrang kiba dang khlaiñ ka bor met jong 3 tylli ki College ha Ri-Bhoi ba kynthup ïaka Ri-Bhoi College, Balawan College bad ka Ri-Bhoi Synod College kila pyndep ïaka prokram ai jinghikai ba 1 taiew lynter ban long kum ki Aapda Mitra Volunteers ne ki nongïarap haba don kano kano ki jingjia ne jingshah lyngshop haki bor mariang.
Kitei ki 50 ngut ki samla ki dei ruh ki kynhun ba nyngkong ban pyndep ïa katei ka jinghikai hapoh ka Yuva Aapda Mitra Scheme bala pynlong da ka State Disaster Management Authority, Meghalaya bad ka District Disaster Management Authority, Ri-Bhoi District bad ïa kitei ki 50 ngut la pynkup burom mynta ka sngi haka jingïalang kaba la long ha Ri-Bhoi College.
Ha katei ka sngi ka jingpynkup burom la wan ruh ban shim bynta da u Abhilash Baranwal Deputy Commissioner ka Ri-Bhoi District kum u kongsan haka jingdonlang ka kong B Ranee ADC bad CEO ka DDMA, Bah J Mawthoh DDMO, Ri-Bhoi District, Bah BK Swer Deputy Controller cum Training Coordinator (YAMS), Civil Defence, Nongpoh, ka kong E Kharkongor Principal ka Ri-Bhoi College bad kiwei kiwei.
Ka thong jong katei ka prokram ai jinghikai ka long ban hikai ïaki samla kiba dei ki dkhot jong ka NSS ba kin tip ïaki jingtip ba kongsan kumno ban pynkhreh haba don kano kano ka jingjia ne ka jinglyngshop mariang bad ki lad jingïada kiba hakhmat eh ba dei ban leh bad kane kan ïarap shibun ïaka tnad Disaster haba don kano kano ka jingjia kiba kyrkieh.
Na ka liang u DC ka Ri-Bhoi haba kren ha katei ka sngi u la ong ba katei ka prokram ka long kaba donkam eh naka bynta ka imlang ka sahlang bad kyrpad ïaki samla ba kin pyndonkam hok ïaka jinghikai kaba kila ioh bad pynim ïaki mynsiem briew haka por ba don ka jingjia haba ki leit phai sha ki shnong ki thaw bad kyrmen skhem ba katei ka jinghikai kan long shisha ka jingmyntoi hakapor ba donkam ka jingïarap ba kyrkieh.
