Da ki phew lak shah lute ka dukan mobile ha Motphran, ym treikam ka CCTV Sorkar

Shillong, Jylliew 14: Ki nongtuh nonglute ha ka step jong ka sngi ba ar, ki la prong bad kyndang ïa kawei ka dukan die mobile kaba don ha Motphran bad la suba ka jingshah tuh ki mobile bad kiwei ki tiar ka lah ban poi shaduh ka 20 lak tyngka.
Kane ka dukan kadei ka kyrteng ka Techspark kaba don marsyndah bad ka Pariat Store ha kaba ka jingshah lute ka la palat ïa ka 20 lak.
Ha ba pyrshang ban kylli na u trai dukan, u Bah R. Pariat halor ka jingtip kaba ki trai ki ïoh halor kane ka jingjia, ki la ïathuh ba la ïoh jingtip ynda ki la wan plie ïa ka dukan ha ka por 8:40 mynstep ha kaba ki la ïohi ïa kane ka jingshah tuh namar ka jingshah kyndang ka jingkhang bad ka jingsaphriang ki tiar ki tar ha madan. U la ïathuh ruh ki runar ki la tuh tang ki mobile kiba rem barem bad ki iehnoh ïa ki mobile ba tad. Haba la kylli katno tylli ei ei ki mobile kiba shah tuh, u la iathuh ki don kumba 50 tam tylli ei kiei ki mobile ba shah tuh. Kine ki nonglute ki la sei lut ïa ki mobile ba ki tuh bad iehnoh tang ki synduk.
Haba la kylli pat la ki buh ne em ïa ki kor CCTV ha ka dukan jong ki na ka liang ki trai dukan ki la ïathuh ba ha ka jingshisha ki buh tangba kine ki nonglute ki rah lut ïa ki kor kiba ka CCTV ka save ïa ki dur ne footage katba ka CCTV kiba la buh da ki Pulit pat kim treikam satia.
Na ka liang ka Crime Scene Unit jong ki Pulit ka la poi ha katei ka dukan bad ka forensic team ki la pynlong ïa ka jingjurip ïa kane ka jaka ban peit bad tohkit na ki snap kiba la paw dak ha kane ka dukan.
Hynrei na ka liang ki paidbah kiba la ïohi bad lap ïa kane ka jingjia, ki la pynpaw ka jingsngew lyngngoh kumno ki nonglute ki ïoh ban tuh na kane ka dukan ha kaba kadei kaba don hakhmat surok bad ka Motphran kadei ka jaka kaba ju don ki Pulit bad ki CRP wat ha ka por mynmiet ruh.
Halor ka jingbym treikam ki CCTV ha Motphran, la don ki Pulit kiba ïathuh ba ym dei tang ha Motphran, hynrei ki CCTV kim treikam ha baroh kawei ka nongbah Shillong, lait noh tang kawei kaba don ha ki thaiñ Umsohsun kaba treikam.