Da ki phew hajar kilo man ka sngi wan poi u phan nabar jylla bym ñiew kor shuh ki nongrep

Nongstoiñ, Jymmang 12: Ka jingpynmih ïa ki mar rep ha ka jylla Meghalaya katba nang mih ki sngi ka la nang duna hynrei ka jingbun briew pat ka nang kiew man la u snem. Kumba 75% na ki paitbah nongshong shnong hapoh ka jylla ki dei kiba im ha ka rep ka riang khamtam eh ha ki nongkyndong. Hynrei ka rukom rep pat ka long tang ban pyrthuh bud ïa kiwei bad ruh namar ba kim don kiwei kiwei ki kam ban trei.
La jan baroh nongshong shnong khamtam eh ki samla kiba la pynlut ïa ka por jong ki ha ki jingpule, ki ud ki nam bad ki bynñiaw ba kim ïoh kam sorkar katba ïa ki kper ki phrah, ki lyngkha ki risai ki sah shrah.
Haba phai sha ka rep ka riang ym lah ban len ba ha ki por ba mynshuwa ñiar eh ban ïohi ba ki pynthor kba ki sah shrah ha ka por tlang, namar ka jingrep phan ka jur bha bad ki don ki nongshong shnong kiba don bun ki pynthor ynda la poi u bnai Jymmang ba ka la dei ka aïom tih phan, ki nongrep kiba trei shitom bad kiba rep bun ki ju shalan ïa u phan sha Shillong da ki phew hajar kilo ha ka shi taïew. Hynrei ha kine ki sngi wat tang u phan ban shet ha ïing ruh hap ban leit thied na ïew.
Haba phai ha ka rep ka riang katba nangmih ki sngi ki rukom rep ba thymmai ki nang mih ki prokram ai jinghikai ha ka rep ka riang ki nang bun hynrei ka jingpynmih ïa ki mar rep ka nang duna.
Ym lah ban len ruh ba u mar rep u ba ki paitbah nongrep ki kham pynmih bun ha kine ki sngi, u dei tang u synsar hynrei wat lada ki ïoh nong katno katno ruh kam don jingmut, namar ïa ki jingdon kam na ka bynta ka ïing ka sem bad ki khun ki kti la hap ban thied na shawei pat bad ki hap ban pynlut da ki phew hajar man la u bnai. Lada ka long kum ha une u snem lei lei ba ka ïew synsar ka hiar dor shaba palat kam don jingmut shuh ïa ki nongrep ba kin trei shitom ban rep synsar.