Da ki phew gram duna ki maw thew kilo ha ki dukan heh ha Ïewduh, phah khang ka HANM

Shillong, Nohprah 16: Ka seng Hynñiewtrep Achik National Movement, East Khasi Hills District (EKHD) ha ka jingleit talasi ïa ki kot ki sla, naduh ka labour license, trading license bad kiwei kiwei na ki katto katne tylli ki dukan ka la lap ba ki don ki dukan bar jylla kiba ym don ki laisen khaïi ba dang treikam, bad khamtam eh kaba kyndit ka long ban lap ïa ki maw thew kilo ba ki duna thew ne gram haba ïanujor bad ka jingthew kaba da ka kor degital.
Hadien ba ka seng ka la lap ïa kine ki dukan ba ki la leh ïa ki kam khaïi da kaba beaiñ ki la phah khang khyrdep noh.
Hynrei katba ka dang leit bad dang ïaid ka jingtalasi bad khynra ïa kiwei pat ki dukan kane ka jingthmu jong ka seng ka la pulom noh hadien ba ki pulit jong ka Cantonment ki la wan ban pynsangeh noh ïa ki dkhot ka seng namar ki khlem ïoh bor ban khynra ne phah khang ïa ki dukan khlem da la synran lang da ki tnat ba dei peit.
Ha kane ka step sngi baar ka la mih ka jingïakren kaba la neh slem bha hapdeng ki nongïalam ka HANM bad ki pulit ophisar ka Cantonment kiba la khang beit ïa ki dkhot ban kin bteng ïa kane ka jingkhynra ïa ki kot ki sla ïa ki dukan ha Ïewduh.
Hadien ba la shah pynsangeh noh ïa kane ka jingkhynra u General Secretary ka seng u Bah Barthol Sohlang u la ong namarba ka seng ka la ïoh ka jingujor na ki paidbah halor ka jingdie beaiñ bad die tam dor ki dukan bar jylla ha Ïewduh kumta ka seng ka wan ban khynra bad u la ong ba kane ka dei tang ka jingsdang bad kan dang ïai bteng ha ki sngi bad ki bnai ban wan.
Katba u Samla Onister Nongkynrih President HANM EKHD, bad u Bah Moon Dhar Vice president Central Body ki la kyntu ïa ki paidbah ba kin long kiba husiar haba thied jingthied na ki dukan bar jylla ha Ïewduh namar ka jur ka jingleh thok, ka jingthew thok khamtam ha kane ka por ba ki paidbah ki bun kam ban thied na ka bynta ka jingrakhe Khrismas bad snem thymmai.
U la ong ba watba la ïoh ban khynra tang khyndiat tylli ki dukan, ka seng ka la lap da la ki jong ki khmat ba ki dukan bar jylla ki la leh thok bad kamai thok da kaba die pynheh dor bad pynduna kumba 10 gram ïa ki maw kilo katno ka long ka jingduhnong jong ki paidbah nongthied, kumta ki paidbah kin hap ban husiar.
Kine ki nongïalam ki la ïathuh ruh ba ki la dep pyntip sha ka KHADC, Hima Mylliem bad ki Pulit Syiem ha shwa ban pynlong ïa kane ka jingkhynra.
Ki la kynthoh ruh ïa ka KHADC ba kam shym la phah satia ïa la ki jong ki briew ban ïadonlang ha kane ka step da kaba kynnoh ba ka lah ban don eiei sha lyndet.
Shuh shuh na ka liang ka seng ka la pynpaw ruh ba dei halor kane ka jingleh buituh ïa ki maw kilo ba bun na ki paidbah ki shait ud ba wat hadien ba ki la pynlut bun ka pisa haba peit pat ïa ki tiar ba ki thied ki long kiba dang duna.