Shillong, Nailur 20 : Ka Young Talent Badminton Club, Mawlai ka la pynthymai ïa ki nongkitkam jong ka klob ha ka 16tarik mynta u bnai hadien ba naduh u snem 2019 kam shym la don shuh ki nongkitkam kiba pura.
Katkum ka kyrwoh la ong ba katei ka urlong hadien ba ki nongïalehkai ba la rim bad kiba kham ieit ïa ka klob hapoh ka jingbtin lynti jong u Chairman, Bah D.khongwir ki la kyntu ïa ki samla kiba ju ïalehkai na ka klob ban pynthymai nongkitkam khnang ba ka kam jong ka klob kan ïaid beit.
Shuh shuh la ong ruh ba da ka jingai bor jong u Chairman, ki nongïalehkai ki la shimkhia bad khot ïa ka general meeting ha ka 16tarik myntabu bnai bad jied artad ïa ki nongïalam kiba thymmai.
Ha katei ka jingïalang la jied ïa u samla Donborson Warjri kum u President, ïa ka ka kam Vice President da u Samla Raphael L.Nongrang. Ha kaba ïa dei bad ka kam General Secretary ka Club ka la jied biang da u samla Sunny B Warjri ban shimti biang ïa katei ka ka, nangta ïa ka kam Assistant General Secretary la jied da u Samla Benny Enrich Kharbuli, ïa ka kam Treasurer la pynkhamti biang ha u Samla Vickie Nongrang.
Ha kane kajuh ka sngi la jied ruh ba ïa ka kam Organizing Secretary bad Coach da u Bah Kynsailang Mylliem Umlong, ïa ka kam Publicity Secretary la bat da ka Cherly Mawlieh nalor ki san ngut ki dkhot kiba dei ki nongïalehkai ba dang samla ba ju mih na ka klob ha kiba bun ki jingïalehkai ba ka klob ka phah.
