Da ki nongialam ba thymmai pynkhreh ka Congress ban pynkhlain ha Mawlai

Shillong, Lber 25 : Ka Meghalaya Pradesh Congress Committee ka la sdang nyngkong mynta na Mawlai ban pynkhlain ia ka party kum ka jingpynkhreh na ka bynta ka elekshon MLA kaban long ha u 2023.
Katei ka sienjam ba ka Congress ka shim kadei hadien ba la mih ki kynrum kynram ha ka party Congress kaba la poi haduh u pud ba san ngut ki MLA ka party ba kynthup ia u MLA ka Mawlai ba kin leit ban iasoh noh sha ka sorkar MDA ba ialam da ka NPP.
Na ka liang ka MPPC ruh khlem buhteng shuh ha ka 17tarik mynta u bnai ka la pynbna ba la thung noh ia u Bah Mawshan Sing Giri Hynniewta kum u Adhoc President jong ka Mawlai Block Congress Committee.
Ka khubor ba iajan bad ka party ka iathuh ruh ba ha ka 28tarik mynta ubnai ki heh Congress kin hiar lut sha Mawlai ha ka jingialang kaba la pynbeit ha Mawlai Mawdatbaki Inddoor Stadium naduh ka por 1:30 baje mynsngi ban pynskhem ia ki nongkitkam ba thymmai bad ruh ban pdiang burom ia u Marbud Dkhar sha ka party.