Da ki nongïalam ba thymmai ka KSU Umïam Circle pynkhlaiñ ka KSU ïa ka jingshakri ha ka Umïam

Nongpoh, Nailur 04: Ban dang bteng ïa ka jingshkri na ka bynta ka bha ka miat ki paidbah kumba la suit la shor ïa ka seng ban shakri bad ban ïada ïa ka la ka jaid bynriew, ka Khasi Students Union, North Khasi Hills District Unit ka la lah ban pynthymmai biang ïa ki nongïalam ka KSU Umïam Circle ha Ri Bhoi ha ka jingïalang kaba la long ha ka Sngi Saitjain ha Orchid Umïam ha Ri Bhoi.
Ïa kitei ki nongïalam ba thymmai ka KSU na ka bynta ka samoi treikam jong u snem 2022 haduh u snem 2025 la wan ruh ban pynskhem bad ban pynsmai da u nongïalam ba rangbah ka KSU, u Samla Lambok Star Marngarbad ha ryngkat ka jingdon lang ki nongnïalam ba kynthup naduh u Vice President ka sengkmie, u Samla Biangbor Paliar, u Assistant General Secretary, u Samla Eric Nongkynrih, u President ka KSU North Khasi Hills District Unit, u Samla Ferdynald Kharkamni bad kiwei ki nongïalam ha ryngkat ruh ka jingdon lang u Assistant Rangbah Shnong ka Umïam, u Bah E Ïaphniaw bad kiwei kiwei de.
Nalor kiwei kiwei ki nongïalam ba la pynskhem bad pyntian smai kum ki nongïalam ba pura ka KSU, ha kane ka sngi la pynskhem ïa U samla Bashem Kharnaior kum u president bad u samla Rijonstastar Rani kum u general secretary ka KSU Umïam Circle.
Lyngba jong kane ka sngi, ka KSU Umïam Circle ka la ioh ruh ban pynkupburom ïa u samla Wellborn Kharbudnah u nongïalam barim jong ka KSU Umïam Circle u ba la noh synniang shibun bad u ba ju don bynta bad ka seng ha kiba bun ki kam ba ka seng ka shakri ïa ki paidbah.
Haba ai jingkren ha katei sngi, na ka liang u President ba rangbah ka KSU, u Samla Lambok Star Marngar u la ai ka jingkyntu ka jingkynpham ïa ki dkhot bathymmai baroh ba kin long kiba shitrhem ban ïai trei na ka bynta ka dawbah jong ka Jaidbynriew.
Shuh shuh, hadien ba kitei ki nongïalam ki la shimti kum ki nongïalam bad ki dkhot ba pura ka KSU, u Samla Lambok Star Margnar u la pynkynmaw ruh ïa ka mat treikam ka KSU ba ka ieng skhem haduh mynta ban dawa ïa ka jingpyntreikam ïa ka ILP, ki kam kam pud ki kam sam, ka jingsngewkhia ka seng halor ka jingkyrduh kam kyrduh jam ki samla pule bad kynthup kiwei kiwei ki kam ba ka seng ka shakri.
Ha kawei ka bynta u la ong ruh ba ka jylla kam donkam shuh ïa kita ki nongmihkhmat sam khiew sam pliang, hynrei la donkam ïa ki nongmihkhmat ba kin shna ïa kita ki Polisi ba ïada bad ba kyntiew ïa ka jylla, namar 50 tylli ki snem ba ka jylla ka la ïaid lynti dei tang ka Meghalaya Land Transfer Act kaba dei ka aiñ ba khlain ba la wanrah da u Bah M.N Majaw, u la bynrap.