Shillong, Lber 22: Ka khubor ba la ïoh na ki pulit la ïathuh u nongshong shnong ka shnong Haripur u la phah ka jingujor ba ha ka 14 tarik mynta u bnai ha ka por 9 baje mynstep, san ngut ki briew na ka shnong Haripur (WGH) ki la tied ïa 3 ngut ki nongshong shnong jong kane ka shnong da ki nar rod.
Ha kawei pat ka jingjia ki pulit ki la ïathuh ba u Joyonto Ch Sangma u la phah ka jingujor ba ha ka 4 tarik mynta u bnai ha ka por 4.10 baje janmied, kawei ka auto-rickshaw kaba don u nombar ML-08K-5616 ba la niah da u Tiodat M Sangma, ka la leit ban tynrah ïa ka kali jong u kaba don u nombar ML-08K-7342 ha PT Sangma Road (WGH) bad ka la phet na katei ka jaka. Kham hadien ki pulit ki la ïoh ban bat ïa katei ka auto-rickshaw bad uba niah ïa ka. Utei uba la ujor u la ïathuh shuh shuh ba u nongniah katei ka auto-rickshaw u khlem siew satia ïa ka pisa ban maramot ïa ka kali jong u kaba la julor, kumba la ïa mynjur.
Ki pulit ki la ïathuh ba Dr. Editha W Momin la phah ka jingujor ba ha ka 14 tarik mynta u bnai, uwei u riew thok uba kyrteng u Suman Saha, uba la pynithuh ïalade ba u dei u nongtrei ka Abisa Pharmacy, u la shim ïa ka snam nongmuna na ki nongpang ha Tura Christian Hospital (WGH) da kaba aidaw ban leh ïa ka medical test bad u la shim ruh ïa ka bai test haduh T. 4,000/-. Kham hadien la lap ba katei ka Pharmacy ka khlem ai bor ïano ïano na ka bynta kane bad u Suman Saha um dei ruh u nongtrei ka Abisa Pharmacy.
