Shillong, Jylliew 22 : U Myntri Kam Pohïing jongka ri u Amit Shah ula pynpaw ba un sa phah da ki MP bad Myntri sorkar pdeng ne da ka Inter-ministerial Central Team (IMCT) ban wan jngoh ïa ka jingshah ktah na ka jingjurslap bad shlei um haka jylla Meghalaya bad Assam khnang ba kin ïoh lum jingkheiñ katno ka jingjulor ka la poi bad ba ka sorkar pdeng kan ïoh ban mang pisa ban ïarap ïa kine ki ar jylla.
Kane ka kynhun IMCT kan leit jurip ïa ki jaka ba shah ktah na ka jingshlei um, ki jingtwa kiba jia ha Meghalaya bad Assam.Kane ka kynhun kan wan jurip naduh 26 tarik haduh 29 tarik mynta u bnai, ïathuh u Amit Shah.
U Shah u la pynpaw ruh ha ka Tweeter jongu ba ula dep ïakren da lade ïa u Myntri Rangbah ka Meghalaya u Conrad K Sangma bad kumjuh ruh ia u Myntri Rangbah ka Assamu Himanta Biswa Sarma halor ka jingshah ktah jongki na ka jingther u lapbah. “ Ka sorkar hapoh ka jingïalam u Modi ka ïadon ryngkat bad ki paidbah ka Meghalaya bad Assam ha kum kane ka por ba ki mad ïa ka jingeh kaba khraw” pynkut u Shah.
