Nongpoh, Jymmang 31: Namar ka jingshlei um na ka jingther u slap ha kine ki khyndiat sngi bala dep, ka kynhun SDRF jong ka jylla Assam ki la hap ban pyndonkam da ki lieng ban kit ban bah ïa ki khynnah skul bad kumjuh ki paidbah namar ka jingdap um ka surok bad ka jingbym lait shuh ki kali ban leit ban wan namar ka surok bah National Highway ka la kylla long kum ka wah bah.
Bun na ki khynnah skul bad ki paidbah ki hap ban shu ieng shi jaka namar kin nud shuh ban leit phai shala iing namar ka jingheh jong ka um ha ki bynta jong ka surok ba pynïasoh ïa ka jylla Assam bad Meghalaya, bad dei namar ka jingeh ba kynduh da ki khynnah skul bad ki paidbah ki pulit SDRF ki la hap ban pyndonkam da ka lieng kum ka jingïarap ïa ki ba kin poi sha la iing bad ban jam na ka jaka ba shlei um.
Haduh ka janmiet jong ka 31 tarik Jymmang ka um ha katei ka jaka ka la sdang ban rngad lait noh tang ka ahor ktieh kaba la pynthut ïa ka leit ka wan ki paidbah na ka jingtih khyndew khlemakor ha ka thaiñ Jorabat.
