Da ki lak ki tynrai dieng la ju thung man ka snem: katno tylli pat kiba khie im?: LT Tariang, MCS

Mawkyrwat, Jylliew 05 : U In-Charge Deputy Commissioner ka South West Khasi Hills District, u bah L.T. Tariang, MCS, haba ai jingkren kum u kongsan ha ka jingrakhe ïa ka sngi pynneh pynsah ïa mei mariang ne ka World Environment Day 2025 ha South West Khasi Hills District u la pynkynmaw da kaba buh jingkylli ba manla ka snem la rakhe ïa kane ka sngi kyrpang da kaba thung da ki lak tynrai ki dieng, hynrei katno tylli pat na kita ki khie im?
Namarkata, u la ai mynsiem ba haba ki rakhe ïa kane ka sngi, kim dei ban shu kut tang ha kane ka 5 tarik u jylliew manla ka snem hynrei ka dei ka jingrakhe pynneh pynsah mei mariang manla ka sngi bad haba ki la thung ki dei ruh ban don ka jingkitkhlieh ban sumar khnang ba uta u tynrai dieng uba ki ki thung un khie im bad nang-heh nang-san.
Ym tang kata, u bah L.T. Tariang, MCS, In-Charge Deputy Commissioner ka South West Khasi Hills District ula ong ba ha kane ka juk ba mynta ka la dei ruh ka por ba kum ki nongshong shnong ki dei ban don ka jingkitkhlieh ban kiar na kaba leh pathar ïa ka mei mariang kum kaba bret pathar ïa ki platik, thang dusmon ïa ki lum, siat pynduh jait ïa ki sim bad ki mrad ki mreng da kaba kin sdang ïa ki jinghikai na la ïing la sem, na shnong na thaw, ka imlang ka sahlang bad kumta ter ter.
Shuh shuh u la pynshai ruh ba balei la ju khot tang ïa ki khynnah skul ha kum kine ki prokram, ka daw ka long ba dei na ki, kin long kita ki tyndong jingpynsaw ha ki paidbah ba kin sngewthuh halor ka jingdonkam ban pynneh pynsah ïa ka mei mariang namar ki khynnah skul ki dei ka lawei jong ka ri bad ka jaidbynriew bad ki nongrah khubor jong ka jingkylla.
Lah ban kdew ba ïa kane ka sngi pynneh mariang ha ka 5 tarik u jylliew, 2025 la pynlong da ka ophis jong u District Planning Office jong ka South West Khasi Hills District, hapoh ka jong ka Chief Minister’s Youth for Green Campaign Movement ha kaba ïa kane ka jingïalang la pynlong ha Multipurpose Hall jong ka ophis jong u Deputy Commissioner’s ha Laitlawsang, ha kaba la buh ïa ka phang pdeng, “Pynkut noh ïa ka jingjaboh da ki plastik ha ka pyrthei baroh kawei.”
Shuh shuh kum shibynta jong ka jingrakhe, la pynlong ruh ïa ka jingthung dieng, ha kaba la ïashim bynta shitrhem da ki ophisar, ki nonghikai, bad ki khynnah skul na ka distrik ha kaba ki la ïoh ruh ban thung haduh 50 tylli ki tynrai dieng.
Kiwei de ki bynta ba kongsan jong kane ka prokram ki long ka jingrwai pdiang burom na ki khynnah skul Maharam Government Higher Secondary School, Mawkyrwat; ka jingshad na ki khynnah skul jong ka Christian Principle’s Academy, Mawkyrwat; bad ka jingsam khusnam sha ki nongjop ha ka jingïakop dro dur, jingïakop thoh esay, bad ka jingïakop kren muk-mak kata ka Lawanpliebok Kharhari, u Robin Iawphniaw bad u Phalnestar Lyngdoh ki nongjop ha ka jingïakop dro dur, kiba jop ha ka jingïakop thoh esay ki long ka Jahanna Isaca Hynñiewta, u Aibandonnam Nongrum bad ka Badañiewkor Lyngkhoi, nangta, ka Graceness Khongjang, ka Naka Sabet Lyngdoh bad ka Balarikynti Kharsyiemiong ki nongjop ha ka jingïakop kren muk-mak.
Napdeng kiba la ïadonlang ha katei ka prokram ki long u bah F.B. Basan, MCS, District Planning Officer jong ka South West Khasi Hills District; u bah L. lyngdoh uba dei u Myntri ka shnong Mawten; bad u bah O.L. Passah, Superintendent ka Fisherise, South West Khasi Hills District lem bad ki Myntri Shnong.