Shillong, Jylliew 02 : U Working President jong ka National People’s Party ba dei ruh u Myntri sorkar ka jylla, Marcuise N Marak ha ka sngi Nyngkong u la ong ba ka jingjied ïa ki kyrtong na ka bynta ka elekshon MDC ha Garo Hills Autonomous District Council (GHADC) kan dei beit da kito kiba i tikna ba kin poi sha ka thong.
Haba kren bad ki lad pathai khubor, une u heh ka NPP u la ong ruh ba ka party ka la pynkhreh shaid shaid mynta na ka bynta ka elekshon MDC ha GHADC.
“Ki don ruh katto katne na ki kyrtong kiba la dep ban ïaid shakhmat ban pynkhreh na ka bynta kane ka elekshon,” u la ong.
Da kaba kdew ïa ka jingwan pynïasoh jong ki arngut ki MLA barim ryngkat ki nongkyrshan ha East Garo Hills, u Marcuise u la ong, “Kane kadei ka dak ba ngi la ïaid shakhmat ïa ka jingpynkhreh mynta.”
Halor ka jingkylli, u la ong ruh ba ka party ka la ïaid shaid shaid mynta wat na ka bynta ban wad ïa ki kyrtong kiba thymmai.
“Hynrei ka jingjied ïa ki kan long beit katkum ka jingi kyrmen jong ki ban jop,” u la bynrap biang.
Nangta u ong ruh ba ka thong jong ka party hi ka long ban trei borbah khnang ba ka party kan ïoh ban jop kham bun ki MDC bad ïoh biang ïa ka bor ban synshar ha ka Executive Committee kaba thymmai.
“Ngin leit sha u paidbah da kaba pynshong nongrim ïa ki kam jong ka party bad ngin pan ruh ïa ka jingkyrshan jong ki,” u la ong.
