Da ki kyndon pynap ka KHADC lada bteng khate kilo ïa ki mar rep ha ki ïew ki hat

Shillong, Nohprah 11 : U Chief Executive Member (CEM) ka KHADC, Bah Pynïaid Sing Syiem ha ka sngi Balang u la ong ba ka Council ka la wanrah mynta ïa ka Rules kaban teh lakam bad buh kyndon ruh lada ka jingot kilo ïa ki mar rep ha ki iew ki hat ka dang bteng nangne shakhmat.
Haba kren bad ki lad pathai khubor hadien ka jingïalang jong ka Executive Committee, u CEM u la ong ba ïa kane ka Market Rules kaban sa wanrah ha kane ka Dorbar Tlang la pynshong nongrim katkum ka Market Act 2023.
“Lyngba kane ka Rules, ki nongrep na ki san tylli ki distrik ba hap ha u pud u sam ong ka KHADC kin ïoh ïa ka jingmyntoi namar kan don ka kyndon ba kan ym don shuh ka jingot kilo ïa ki mar rep jong ki nongrep ha Ri Khasi,” la ong u CEM da kaba bynrap ba kane ka kyndon kan treikam ha baroh ki iew la ka long ha ki iew jong ka Council, jong ka Hima bad ruh ha ki iew shnong.
Ban pyntreikam pura ïa kane ka kyndon, u CEM u la pyntip ruh ba kan don ka kamiti kaba lah wat ban pynshitom ïa kito kiba pynkheiñ ain da kaba bteng ban ot kilo.
Ha kajuh ka por u la ïathuh ruh ba ka Executive Committee ka la shim ïa ka rai ban pynmih ïa ka Notification lane ka jingpynbna ba kan don noh da u pud ba ki paidbah ki lah ban thied jaka puta ha ka Raid Marwet, Ri Bhoi District. Katkum ka jingong jong u, nangne shakhmat ki bym dei ki Riewlum na kane ka jylla kata lait na ki Khasi, Jaintia bad Garo kin ym lah shuh ban thied jaka ha katei ka thaiñ kaba don ha khappud bad ka jylla Assam.
U la ïathuh ruh ba ha kane ka kyndon, la buh bad batai bniah ba kito trai muluk kiba thied jaka ban buh ïa ki jaka sah ne ki homestay kan dei katta akar, nangta kiba kwah ban buh karkhana kan dei katta akar abd na ka bynta kito kiba kwah ban buh hotel, ki jaka khaii pateng, jaka pule, la ka long kum ki college, university kan long katta akar.