Da ki kot lyngkdop sam ki pulit sha ki nongñiah trok ban hikai kumno ban ïaid ha surokbah ban lait na ki jing aksiden

Nongpoh, K’Lyngkot 05: Kum shibynta ban pynduna ïaki jingjia aksiden khamtam ban hikai ïaki nongñiah ïaki kali heh ban ïaid naka liang ka diang jong u surok lait noh haka por ba ki kwah ban leit shakhmat kawei pat ka kali, ki pulit ka Umiam PS mynta ka sngi kila leit ban sam da ki kot lyngkdop sha ki nongñiah kali heh khamtam ki trok ban bud ryntih ïaki rukom ïaid kali khamtam ban lait naki jingjia aksiden.
Ïa kane ka jinghikai bad ka jingsam ïaki kot lyngkdop la pynlong ha shilynter u surok bah haka thaiñ Umiam da ki ophisar pulit ka Umiam PS ban pynthikna ïaka jingshngaiñ ki paidbah haba ki leit ki wan ha surok bah kumba la ju hikai man ka por.
Lah ruh ban pynkynmaw hangne ba ki pulit ka Ri-Bhoi hapoh ka jingïalam u SSP barim u VS Rathore ki ju pynlong ka jingtalasi ba man ka por ryngkat ka jinghikai sha ki paidbah kiba ñiah kali ban bud ryntih ïaki kyndon ban lait naki jingjia aksiden kumba ka surokbah ha Ri-Bhoi ka dei kawei naki jaka kaba jur bha ka jingjia aksiden bad khamtam ka jingduh noh ki mynsiem ba lui lui tang namar ka jingkhlem akor jong ki nongñiah kiba ñiah thurmur ïaki kali, hynrei lyngba ka jinghikai bad ka jingtalasi ba man ka por jong ki pulit ki jingjia aksiden kila hiar arsut ha Ri-Bhoi District namar bun ki paidbah kila sdang ban sngewthuh bad ban adkar haba ki ñiah kali.