Da ki kot lyngkdop, bthah ka HYC ïa ki nongwan jngohkai ban pynneh ka jingitynnad ka mariang

Shillong, Risaw 18: Ka HYC Sengkmie lyngba ka Environment Cell ha ka sngi saitjaiñ ka la pdiang sngewbha ïa ki nongwan jngohkai kiba wan sha ka thaiñ Sohra bad kumjuh ruh sha ki jaka kiba don ha ka thaiñ Khasi-Jaiñtia, bad kane ka jingpdiang sngewbha ka seng ka la khot ruh ïa ki ba kin ïasnohkti lang ban pynneh pynsah ïa ka jingitynnad ka mei mariang.
Ha kane ka jingpdiang sngewbha na ka liang ka seng Hynñiewtrep Youth Council ka la sam da ki kot lyngkdop sha manla ki kali kiba kit ïa kiba wan jngohkai sha kitei ki jaka da kaba pynpaw ruh ïa ka jingangnud jong ka seng ba ka long kaba donkam kyrkieh ban ïada bad pynneh pynsah ïa ka sawdong sawkun.
Na ka liang u Vice President I/C Administration ka HYC-CEC u Samla Francis G. Mawlong u la ong, “Ka long kaba shisha ba ka donkam ka jingïada kaba kyrkieh bad kumjuh ruh ka jingpynneh pynsah ïa ka sawdong sawkun na ka daw ka jingkiew jong ka jingwan kiba jngohkai, kumta ha kane ka sngi ki la kyrpad ïa ka jingïatreilang haba ïadei bad kane ka bynta kaba kongsan.”
Ha ki kot lyngkdop ka seng ka la buh ïa kiei kiba dei ban leh bad kiei ki bym dei ban leh. Ha kaba ïadei bad kiba dei ban leh, ka seng ka la bthah ïa kiba wan jngohkai ba ki dei ban bret ïa ki jaboh da ka jingdon jingkitkhlieh, la bthah ba kin pyndonkam ïa ki jaka bret ñuit ne ki bin bad ban pynduna ïa ka jingshah ktah ka sawdong sawkun bad donkam ruh ban rah ïa ki pla bret ñuit ha la ki jong ki kali na ka bynta ban bret bha ïa ki ñuit ha ka rukom kaba dei.
Ka seng ka la bthah ruh ïa ki, ba kin burom ïa ka sawdong sawkun kaba don ha ki shnong ki thaw, nangta ban bud ïa ki kyndon ki shnong ban pynneh ïa ka sawdong sawkun. Ka la ai jingmut ruh ban pyndonkam da ki pla ba lah ban pyndonkam biang, nangta ki bilor umdih bad kiwei kiwei ki ban pynduna ïa ka jingbret ïa ki jaboh jabaiñ.
Ka la bthah ruh ba dei ban pynlong ïa ki jaka paidbah kiba khuid ba suba, kiar na ka jingbret pathar bad ban ïarap pynneh ïa ka jingkhuid ha ki jaka paidbah bad ki jaka jngohkai. Ki dei ruh ban bud ïa ki nongïalam kiba na shnong, ban bud ruh ïa ki kyndon ki shnong na ka bynta ki kam ban leh khuid bad ka jingtyngkai ïa ka sawdong sawkun.
Ha kaba ïadei pat bad ki kam ki bym dei ban leh, ka seng ka la bthah ba dei ban kiar na ka jingkawang ne bret ïa ki ñuit ha ki jaka paidbah bad ki surok nalor kiwei kiwei. Kiar na ka jingpynjulor ïa ki jingthung jingtep bad dei ban burom bad ïada ïa ki mrad khlaw bad ki jingthung ne ki jhur ki jhep. Ka la bthah ruh ba dei ban kiar na ka jingpynjaboh ïa ki wah, ki pung bad kiwei kiba don bynta bad ka um.
Ka la ai jingmut ruh ïa ki nongwan jngohkai ba ki dei ban ieh beit ïa ki mawsiang ne ki maw, ki jingthung bad kiwei ki tiar ka mei mariang ha ki juh ki jaka kumba ki long. Kiar na ka jingpyndonkam ïa ki surok paidbah ban shet ban tiew, ban leit picnic bad ban ïabam ïa dih sngewbha.
“Da kaba ïatreilang, ngin lah ban tyngkai ïa ka jingitynnad ka mei mariang jong ka thaiñ Sohra bad ban pynthikna ba kan ïaineh na ka bynta ka jingmyntoi jong ki pateng ban wan. Ngi khmih lynti ïa ka jingïatreilang jong phi ba kane ka jingwan shangkai kan don lang bad ka jingthmu, ka jingïada bad kumjuh ruh ban rah tang ïa ki jingsah kynmaw, ban ieh tang ïa ki dienjat ha ka thaiñ jong ngi,” ong u Samla Francis.