Nongstoiñ, Jymmang 10: Ka Hynñiewtrep Youths Council Nongklung Unit ha ka janmiet jong ka sngi nyngkong, ka la sam jingïarap da ki Knup sha ki 30 tylli ki longïing ki Nongrep ha Nongklung bad Nongklungrim.
Shuwa ban sam ïa ki Knup sha ki Nongrep la pynlong jingïalang ha kaba la ïa donlang da u Samla Olwolmos Wanniang President HYC Nongklungrim Unit, u Samla Welbester Mawlieh GS HYC Nongklung unit bad kiwei kiwei.
U Bah M.Lyngkhoi Sordar Shnong Nongklung u la pynpaw ïa ka jingkmen ïa kane ka jingleh ka Unit, kaba la phai ki khmat sha ki Nongrep shuwa ban Puh ktieh. U la ong ruh ba u la ïohi ïa ka jingtrei shitom kaba la pynkmen ïa ki paitbah shnong. U la kitbok ba ka seng kan ïai kiew shaphrang bad nang rhem ban trei ïa ka Ri bad ka aitbynriew.
La ïoh jingkren ruh na u Samla Lumlang Kharsyiemlieh President HYC WKHD, u ba la pynpaw ka jingsngewkmen ba ka Unit kaba sei ïa u ban shakri naduh Circle haduh District, da kaba ong ba ka dei ka jingkyrshan jong ka Unit bad ka Shnong Nongklung. U la ong ba kane ka jingsam knup sha ki Nongrep ka dei shi bynta ban kyrshan ïa ki Nongrep bad ban ai mynsiem ïa ki para Nongrep hapoh ka thaiñ. U la ong, “Kane ka jingai knup ym tang ba ka ïarap ban ïada na u slap ka lyer, hynrei kane ka pynskhem ïa ka Riti Dustur barim ba ki Mynbarim ki la lam lynti”.
