Da ki klur pynbna u CM ban theh ha Sohïong hadien ba dep plie ïa ka market complex ba 12.90 klur

Shillong, Lber 31 : U Myntri Rangbah ka jylla, Conrad K Sangma ha ka sngi Palei u la plie paidbah ïa ka Market Complex ha Sohiong kaba don haduh 112 tylli ki dukan ïa kaba la tei ha ka jinglut kaba kot sha ka 12.90 klur tyngka ha ryngkat ka jingdonlang u Myntri ka tnad C&RD, Bah Hamlet Dohling, MLA ka Sohra, Bah Gavin Mylliem bad MLA ka Sohiong, Bah Samlin Malngiang nalor ka DC jong ka East Khasi Hills bad kiwei kiwei.
U Myntri Rangbah haba kren ha ka jingïalang, u la pynbna ruh ba un ai da ki klur tyngka na ka bynta ban kyntiew ïa ka thaiñ Sohiong ha baroh ki liang. Ha kane ka sngi u la pynbna ruh ban ai 3 klur tyngka na bynta ban tei ïa ka ophis treikam kaba paka jong ka Block kaba la treikam ha ka jingtei kaba dei naduh ka por jong ka por Assam.
Namar ka jingkyrpad jong u MLA, u Conrad h u la kular ruh ban ai sa ka Sports Stadium na bynta katei ka thain. “Ngam ju nang ban ong em namar man ka por ba u MLA jongphi u wan shanga u wan beit da ka khmat kaba phuh samrkhie,” la bynrap shuh shuh u Myntri Rangbah.
Ha kane kajuh ka sngi, u Myntri Rangbah u la kular ruh ban pynbiang wat ïa ki kali ban lum ïa ki jaboh jabaiñ kiba mih na katei ka iew. Hadien kane, u la sam ruh ïa ka song pisa kaba 47.75 lak tyngka sha ki 73 tylli ki Producers Group lyngba ka FOCUSS da ka thong ba kin lah ban pynheh shuh shuh ïa ka jingtreikam jong ki.
Shwa kane, u Myntri Rangbah u la ïathuh ruh ba ka sienjam ban kyrshan ïa ki nongrep lyngba ka FOCUSS kadei ka skim kaba nyngkong eh ha ka jylla bad ha ka thaiñ shatei lam-mihngi hi baroh kawei ba kito kiba don ha ka Producer Group kin ïoh 5000 tyngka marwei.
“Ka sorkar MDA kan pynlut 200 klur tyngka ban ai 5000 tyngka marwei sha ki 4.5lak tylli ki longïing. Kane kam dei satia ka ram hynrei kadei ka subsidy. Kane kam dei kaba sam shimet shimet hynrei kadei kaba phi hap ban thaw kynhun 10 ne 20 ngut ha kawei ka kynhun,” ula bynrap shuh shuh.
U Myntri Rangbah u la ong ruh ba kane ka sorkar ka la mang bad pynlut jan dap hajar klur tang na bynta ka jingmyntoi jong ki nongrep. Ha kajuh ka por u kyntu ïa ka Hima bad baroh ban pynïaid ïa ka iew ha kata ka rukom ba kan long ka jingkyrkhu na bynta ki nongrep.
Ha kawei pat ka liang, u la ai khublei ruh ïa u kontraktor ba pyntrei ïa katei ka ïew, Bah Khraw Thabah bad ka kynhun kiba la lah ban pyndep ïa ka ha ka por kaba biang.
Shwa kane, u Myntri ka tnad C&RD, Bah Hamlet Dohling u la pyntip ruh ba katei ka iew ka don haduh 112 tylli ki dukan nalor ba ka don ïa ki jaka ieng kali kiba biang kynthup ïa ka cold storage.
“Mynta phi la lait na u slap na u phria bad kumta phi la dei ban ai ka jingïaroh ïa u MLA jong phi uba la buddien ïa kane ka skim namar kino kino ki skim khlem ka jingbuddien da u nongmihkhmat kam poi shaei shaei ruh,”u la ong.
Katei ka iew kan ai ka jingmyntoi ïa kumba 200 tylli ki shnong kiba hap ha katei ka thaiñ kata kynthup naduh ka Hima Sohiong, Nongspung, Nongkhlaw, Mylliem bad Mawphlang.
Na ka liang u MLA, Bah Samlin Malngiang u la ong ba ha ka por ba u dang rit u ju wan ban ïarap die sha ïa ka kmie ha katei ka iew. U la ong ruh ba um poi pyrkhat satia ba mynta pat kum u MLA un ïoh ban wan plie lang bad u Myntri Rangbah ïa katei ka iew. U la ong ruh ba kaei kaba ki kyrpang na u ka ju urlong beit namar u Myntri Rangbah u dei u Khliehduh jong ka sorkar.
U lakyntu ruh ïa ki nongshong iew ba kim dei satia ban shu biah pathar kat shaba lap hynrei ban sumar khuid ïa ka kum la ka jong.
Ha kane ka sngi la donlang ruh naduh u Chairman ka KHADC bda MDC ka Mawphlang, Bah Lamphrang Blah, MDC ka Sohiong, nangta u Project Director DRDA, ki khieh nongsynshar jong ka Hima, ki ophisar bad ki nongshong shnong bad kiwei kiwei.