Shillong, Nailar, 14: Ha ka jingrakhe ïa ka jingïoh laitluid jong ka ri India, ka President jong ka ri India ka Draupadi Murmu ka la mynjur ïa ka jingpynkup burom da ka khusnam Correctional Service Medals ïa ki Pulit kiba trei ha ki Phatok ha Meghalaya.
Kine ki long u Sushil Baruah uba trei kum u Warder, u Pranab Kr. Das uba trei kum u Assistant Superintendent.
Baroh ki don 1,082 ngut ki Pulit kiba la ïoh khusnam ha ka lyngkhuh dap snem ka jingïoh jinglaitluid ka ri mynta u snem 2022.
Nalor kine, ki Pulit kiba la ïoh pdiang ïa ka khusnam Police Medal for Meritorious Service ki long u Commandant jong ka 6th Battalion, Umran, Ribhoi District u Bah Lakador Syiem, u Superintendent of Police ka West Jaiñtia Hills District u Bikram D. Marak, u Dy. Commandant ka 4th MLP Bn, Vikaspuri, New Delhi, u Thulisserryl C. Chako bad u Armed Branch Inspector Kote, u Galdinson R. Marak.
Ka Khusnam President’s Medal na ka bynta ka jingshlur bad ka President’s Medal na ka bynta ki jingshakri kiba khraw kumjuh ruh ka Gallantry Medal bad Meritorious Services Medals kiba la ai sha ki briew kiba trei ha ka tnat Fire and Emergency Services, Civil Defence & Home Guard ha manla ka Republic Day bad Independence Day ki kynthup ïa u Sub-Inspector Home Guard u Kharnesh A. Sangma bad u Havildar, Home Guard, u Timothy Marbaniang.
