Nongpoh, Nailar 30: Ym tang ban shakri ïa ka bha ka miat bad ka roi ka par ki paidbah, ka NPP Jirang Block kum ka jingai mynsiem ïa ki samla pule bad ryngkat ka jingïatrei lang u MLA ka Jirang u Bah Sosthenes Sohtun mynta ka sngi ka la pynkup burom ïa ki Samla ba pass bha ha ka SSLC examination jong u snem 2025 tang na ka bynta kito ki samla ba hap ha ka Umling C&RD Block jong ka Jirang Constituency.
La pynkup burom bad ai khusnam ruh ïa kine ki samla ba pass bha ha ka SSLC examination ha ka jingïalang kaba la long mynta ka sngi Parish Hall ka St. Francis Asisi, Byrnihat Parish, ba u Rupert Momin kum u Chairman ka Meghalaya New and Renewable Energy Development Agency bad u MLA ka Kharkutta, u la shim ïa ka bynta kum u kongsan bad Bah u Bah Savio Blah, District School Education Officer ka Ri Bhoi kum u symbut kongsan.
La ai mynsiem ruh ïa kane ka jingpynkupburom da ka jingdon lang hi u MLA ka Jirang u Bah Sosthenes Sohtun uba la ïa trei lang ban ai burom ïa ki samla bad ryngkat ka jingdon lang ki samla pule, ki kmie ki kpa, ki nonghikai, ki Principal bad kiwei kiwei ki riew rangbah.
Ka NPP Jirang Block, ha kane ka sngi ka la shim sa ïa kawei ka bynta ban pynkup burom ruh ïa ki Prinicipal jong ki Skul ba mih khmat kitei ki samla ba pass bha bad ruh la pynkup burom ïa ka Kong Wanmontimai Marbaniang kum ka President ba thymmai ka NPWF Ri Bhoi District.
Haba ai jingkren ha kane ka sngi da kitei ki kongsan bad kynthup ruh u MLA, ki la pynpaw ïa ka mynsiem jong ka jingkmen ba ki samla pule ki la trei shitom ban leh bha ha ki examination bad kane ka jingpas bha jongki, ka long ka burom ym tang ïa ka ing ka sem, ka skul bad ka long ruh ka burom na ka bynta ka dong bad ka thain.
Ki la kyntu ruh ïa kitei ki samla pule ba kin dang leh bha ha ki jingpule kaba ki hap ban ïaid sha ki kyrdan kiba shaneng, namar kum ka imlang ka sahlang ka dang donkam shibun ki samla kiba la biang ha ka kyrdan pule bad ruh ban shakri ne ban kyntiew ïa ka bha ka miat bad ka roi ka par jong ka dong bad ka thain.
Na ka liang u MLA u Bah Sosthenes Sohtun, u la ong ruh ba u khmih lynti ban don ruh kita ki samla kiba rung sha ka thup jong ka top twenty ka SSLC examination bad lada don kum kine ki samla u la pynkhreh ruh da ki khusnam kiba kyrpang kaba long ka jingpynshlur bad ruh ban dang ai mynsiem ïa ki khun samala jong ka pateng ban sa wan, u la bynrap.
